د اشغال شوي کشمیر په ادهم پور ولسوالۍ کې د یوه ډېر دردناک ټرافیکي پېښې له امله د ښځو او ماشومانو په ګډون لږ تر لږه ۲۱ کسان وژل شوي او لسګونه نور ټپیان شوي دي دا پېښه د کنوت کلي په سیمه کې هغه وخت رامنځته شوه کله چې یو مسافر وړونکی بس د تیزې تاوې لارې په اخیستو سره له کنټرول ووته او ژورې کندې ته ولوېد
د سیمهییزې ادارې په وینا، په ۴۲ څوکۍ لرونکي بس کې له ۶۰ څخه زیات مسافر سپاره وو، چې له رام نگر څخه ادهم پور ته روان وو. عیني شاهدان او چارواکي وایي چې بس د یوې خطرناکې پیچلې لارې پر مهال له یوه آټو رکشې سره تر ټکر وروسته له سړک ووت او شاوخوا ۱۰۰ فټه ژورې کندې ته ولوېد د پېښې شدت دومره زیات و چې ۱۹ کسان په ځای مړه شول او دوه نور ټپیان د روغتون پر لاره ساه ورکړه
د ژغورنې عملیات
د ژغورنې ادارې وایي چې په پېښه کې ۴۵ کسان ټپیان شوي دي، چې د ځینو حالت نازک ښودل شوی او د مړو شمېر د زیاتېدو وېره شته ټول ټپیان نږدې روغتونونو ته لېږدول شوي او هلته ورته بیړنۍ طبي مرسته ورکول کېږي
د ټرافیکي پېښو جدي وضعیت
د یادونې وړ ده چې په هند او د هغه تر واک لاندې سیمو کې د ټرافیکي پېښو کچه د نړۍ له لوړو څخه ده، چې هر کال زرګونه انسانان پکې خپل ژوند له لاسه ورکوي کارپوهان د دې پېښو لوی لاملونه چټک تګ، خراب سړکونه، د وسایطو ناوړه حالت او له اندازې زیات بار وړي ګڼي