افغانستان کې پېژندل شوی سیاسي شخصیت او د حزب وحدت اسلامي مردم افغانستان مشر محمد محقق پر ټولنیزې رسنۍ «ایکس» کې د «اسلامي جمهوريه هزارستان» بیرغ انځور شریک کړی، چې پکې له ده سره د عبدالعلي مزاري انځورونه هم ښکاري. دا ګام د هغه د وروستیو څرګندونو پر وړاندې د سختو نیوکو په غبرګون کې اخیستل شوی، ځکه هغه ویلي وو چې ډیورنډ کرښه باید د یوې رسمي نړیوالې پولې په توګه ومنل شي.
د هېواد پلور تورونو رد
د ډیورنډ کرښې په اړه د هغه دریځ ځینو سیاسي کړیو سخت وغانده او پر محمد محقق یې د “هېواد پلور” تورونه ولګول. په ځواب کې، محقق خپله پخوانۍ لیکنه بیا خپره کړه او ویې ویل چې د تاریخ له مخې اوس د ده سره د پلور لپاره څه نه دي پاتې. هغه زیاته کړه چې پخوانیو واکمنانو په بېلابېلو دورو کې له برتانوي هند سره تړونونه کړي او د امتیازاتو په بدل کې یې د هېواد د خاورې معاملې کړې دي
د تاریخي تړونونو یادونه
محمد محقق په خپل پیغام کې تاریخي څېرو ته اشاره وکړه او ویې ویل چې شاه شجاع په ۱۸۳۸ کال کې، محمد یعقوب په ۱۸۷۹ کې او عبدالرحمن خان په ۱۸۹۳ کې د کلنیو امتیازونو په بدل کې د دې سیمې په اړه پرېکړې کړې وې. هغه خپلو منتقدینو ته په ټکو ټکو وویل چې هغه کسان چې یوه پېړۍ یې د هېواد برخې خرڅولې، اوس پر نورو د تور لګولو حق نه لري
راتلونکو ته اشاره
د بیرغ له انځور سره، محمد محقق د قرآن کریم دا مفهوم هم ولیکه: “د الله له لوري مرسته او نږدې بریا”. سیاسي شنونکي دا د یوه مهم سیاسي پیغام په توګه تعبیر کوي. باید وویل شي چې د ډیورنډ کرښې موضوع تل د افغانستان په سیاست کې حساسه پاتې شوې او د محقق وروستیو څرګندونو یو ځل بیا توده بحث راپورته کړی دی