بنوں: د عزمِ استحکام او نیشنل ایکشن پلان لاندې د ترهګرو پر ضد عملیات روان دي. د امنیتي سرچینو په وینا، د جاني خېل د شا خان کلا په کلي کې پولیسو او امنیتي ځواکونو ګډ استخباراتي عملیات ترسره کړي دي، چې په پایله کې ۹ خوارج وژل شوي او یو سخت ټپي شوی دی
سرچینې وایي چې ځواکونو ته د خوارجو د شتون په اړه باوري او پټ معلومات ترلاسه شوي وو، چې پر اساس یې د ترهګرو پټنځای محاصره او په نښه شو. د سختې نښتې په ترڅ کې ۹ وسله وال وژل شوي دي.
سرچینې زیاتوي چې وژل شوي کسان څو ورځې مخکې د فتح خېل پولیس سټېشن پر برید کې هم مستقیم ښکېل وو او امنیتي ادارو ته مطلوب وو.
له عملیاتو وروسته په سیمه کې د پاکولو پراخ عملیات پیل شوي دي ترڅو نور تښتېدلي ترهګر او د هغوی سیمه ییز مرسته کوونکي ونیول شي او د قانون منګولو ته وسپارل شي. امنیتي چارواکي وایي چې تر هغه وخته به هدفمنده عملیات دوام ولري تر څو د ترهګرۍ بشپړ ختمونه یقیني شي.