کراچۍ: د پاکستاني شوبز صنعت مشهوره اداکاره امر خان د صنعت دننه د جنس پر بنسټ د تبعیض او د کاسټنګ پر معیارونو سختې نیوکې کړې دي. هغې په یوه شخصي ټي وي پروګرام کې وویل چې زموږ په ډرامو کې ۴۰ او ۵۰ کلن نارینه اداکاران د جین زی (Gen Z) په شان ځوان کردارونه ترسره کوي، خو څوک هم دا غیر حقیقي کاسټنګ نه پوښتي او نه پرې نیوکه کوي.
امر خان وویل چې د شوبز په صنعت کې ښځو ته قوي او مرکزي کردارونه نه لیکل کېږي او اداکارانې له څو کلونو کار وروسته ژر د میندو یا ثانوي رولونو پورې محدودې شي. هغې د هالیووډ مثال ورکړ او ویې ویل چې هلته میریل سټریپ او این هیتوې په هر عمر کې مهم کردارونه ترسره کوي، خو زموږ دلته اداکارانې د عمر له زیاتېدو سره له پامه غورځول کېږي.
یادونه ده چې په دې وروستیو کې د ډرامه انډسټرۍ کې د اداکارانو د عمر او کردارونو په اړه بحث هغه وخت زیات شو کله چې سینیئر اداکارې عتیقې اوډهو فهد مصطفیٰ ته مشوره ورکړه چې باید د خپل عمر له همعمره هیروینو سره کاسټ شي. د فهد مصطفیٰ له غبرګون وروسته دا موضوع په ټولنیزو رسنیو کې وایرل شوه او امر خان هم د دې ملاتړ وکړ.
د شوبز مبصرینو په وینا د امر خان دا بیان د صنعت هغه تریخ حقیقت ښکاره کوي چې نارینه اداکارانو ته اوږد وخت د هیرو رولونه ورکول کېږي، خو ښځینه اداکارانې ژر له مرکزي سکرین څخه لرې کېږي. دا دریځ په ټولنیزو رسنیو کې د مینه والو او نورو ښځینه فنکارانو له خوا هم ښه هرکلی شوی او د کیسو د بدلون غوښتنه لا زیاته شوې ده.