د برصغیر د مسلمانانو په منځ کې د فکري بیدارۍ نوې څپه راپیدا کوونکی لوی مفکر علامه محمد اقبال نن د ۸۸م تلین په مناسبت په درناوي او عقیدت سره نمانځل کېږي. هغه د ۱۹۳۸ کال د اپرېل په ۲۱مه له دې فاني نړۍ څخه رخصت شو، خو د خپل فکر او شاعرۍ له لارې یې نه یوازې د پاکستان د جوړېدو فکري بنسټ کېښود، بلکې د امت مسلمه ته یې د “خودي” او شعوري بیدارۍ داسې درس ورکړ چې تر نن ورځې د نړۍ لپاره د لارې مشال ګڼل کېږي. د دې ځانګړې ورځې په مناسبت د هېواد مشرتابه په بېلابېلو پیغامونو کې د هغه فکري خدماتو ته د درناوي څرګندونه کړې ده.
د اقبال پر مزار ځانګړي مراسم
د تلین په مناسبت د د اقبال مزار (مزار اقبال) کې د ګارډ بدلولو پروقار مراسم ترسره کېږي، چې پکې د پاکستان د هوايي ځواک سرتېري د مزار د امنیت چارې په غاړه اخلي او د ګلونو چادري پرې ږدي. همدارنګه په ټول هېواد کې په تعلیمي ادارو او ادبي ټولنو کې ځانګړي سیمینارونه او پروګرامونه جوړ شوي دي، څو ځوان نسل د شاعرِ مشرق له فکر او د خپلواک وطن له تصور سره اشنا شي
د ولسمشر پیغام
ولسمشر آصف علي زرداري په خپل پیغام کې ویلي چې علامه اقبال یوازې شاعر نه و، بلکې یو داسې اخلاقي او روحاني ځواک و چې د ظلم او نفرت په زمانه کې یې د ملت اعتماد بېرته ژوندی کړ. هغه وویل چې د اقبال د فکر مرکز ټولنیز او اقتصادي عدالت و، چیرې چې د کار او محنت ارزښت ته درناوی کېږي. د ولسمشر په وینا، نن په وېشل شوې نړۍ کې د اقبال د مینې، عدالت او انصاف پیغام د پایدار امن لپاره مهم ضمانت دی
د وزیر اعظم پیغام
وزیر اعظم شهباز شریف علامه اقبال د برصغیر د مسلمانانو لوی محسن بللی او ویلي یې دي چې په اوسنیو ملي او نړیوالو شرایطو کې د اقبال پیغام تر بل هر وخت ډېر مهم شوی دی. هغه ټینګار کړی چې د فکري ګډوډۍ او افراطیت د ستونزو د حل لپاره د حکیم الامت تعلیمات اړین دي، او که ځوان نسل علم، مهارت او کردار د اقبال د فکر په رڼا کې خپل کړي، نو پاکستان به د پرمختګ نوې لوړې تر لاسه کړي
د پارلمان د مشرانو پیغام
د قومي اسمبلۍ سپیکر سردار ایاز صادق او د ډپټي سپیکر سید غلام مصطفی شاه ویلي چې د پاکستان جوړښت د علامه اقبال د فکري اساس پر بنسټ ممکن شو، چې د عدل او روحاني ارزښتونو پر بنسټ ولاړ و. دوی ویلي چې نن د امت مسلمه ستونزې د یووالي او ګډې حکمت عملۍ له لارې حل کېدای شي، چې دا فکر اقبال له پخوا وړاندې کړی و
د ملي عزم تجدید
د هېواد مشرتابه ویلي چې د قوم د پرمختګ لپاره نوې فکري لارې ته اړتیا ده، چې دا یوازې د اقبال په څېر لویو مفکرینو له فکر څخه ترلاسه کېدای شي. هغوی له ولسه غوښتي چې د “فلسفې خودي” عملي کول د خپل فردي او ټولنیز ژوند برخه وګرځوي، څو یو قوي، خپلواک او پرمختللی پاکستان رامنځته شي