د امریکا ولسمشر ډونلډ ټرمپ د ایران سره د سولې خبرو کې د تعطل وروسته د هرمز تنګي د سمندري ناکه بندۍ رسمي اعلان کړی دی د دې پرېکړې له مخې، د امریکا سمندري ځواک به له نن ماښام څخه د دې مهمې نړیوالې لارې څخه تېرېدونکو بېړیو کلکه څارنه او کنټرول پیل کړي، څو د ایران د تېلو سوداګري په بشپړه توګه بنده کړي
ټرمپ په خپل بیان کې چې پر “ټروت سوشل” خپور شوی، څرګنده کړې چې دا ګام د ایران له لوري د هرمز تنګي د پرانیستلو د ژمنې د ماتولو او د اسلامآباد مذاکراتو د ناکامۍ په غبرګون کې اخیستل شوی دی. هغه پر تهران د “نړیوالې باجاخیستنې” تور ولګاوه او ویې ویل چې امریکا به هېڅ هغه بېړۍ ته د تېرېدو اجازه ور نه کړي چې ایران ته یې د تېرېدو فیس ورکړی وي. د امریکا مرکزي قوماندې (CENTCOM) هم ویلي چې د ایران بندرونو ناکه بندي به د دوشنبې په ورځ د 14:00 GMT څخه عملي شي
پر نړیوال اقتصاد اغېزې
د امریکا ولسمشر ادعا کړې چې امریکا اوس د روسیې او سعودي عربستان څخه هم زیات تیل لري، نو د ایران فشار به نور اغېز ونه لري هغه ټینګار وکړ چې ایران ته به هېڅکله د اټومي وسلو د جوړولو اجازه ور نه کړل شي. بل لور ته، د دې اعلان سره سم د نړۍ په بازارونو کې د خام تېلو بیې له ۱۰۰ ډالرو فی بېرل څخه پورته شوې دي، او په اسیايي سټاک مارکېټونو کې هم د کمښت نښې لیدل کېږي
د تهران غبرګون او د شخړې خطر
ایران د امریکا ګواښونه رد کړي او سخت دریځ یې خپل کړی دی. د ایران د پارلمان رئیس محمد باقر قالیباف او د بهرنیو چارو وزیر عباس عراقچي ویلي چې ایران په مذاکراتو کې ښه نیت ښودلی، خو د فشار په وړاندې به تسلیم نه شي. د سپاه پاسداران ځواکونو خبرداری ورکړی چې د هرمز تنګي ته نږدې هر پوځي حرکت به د اوربند سرغړونه وګڼل شي، چې له امله یې په سیمه کې د مستقیمې پوځي نښتې خطر زیات شوی دی