ملګرو ملتونو د ترهګرۍ ضد مرکز مشر مورو میډیکو سخت خبرداری ورکړی چې په نړۍ کې د اټومي ترهګرۍ خطر تر ټولو لوړې کچې ته رسېدلی دی. هغه وایي چې افراطي ډلې او افراد اوس ډرونونو، مصنوعي ځیرکتیا، راډیو اکټیو موادو او پرمختللې ټکنالوژۍ ته لاسرسی لري، چې دا وضعیت نور هم خطرناک کړی دی
ملګرو ملتونو ویلي که څه هم په تېرو ۸۰ کلونو کې تر اوسه هېڅ اټومي یا راډیو اکټیو برید نه دی شوی، خو دا خطر «کم امکان خو ډېر ویجاړونکی» بلل کېږي، ځکه چې پایلې یې انساني، چاپېریالي او اقتصادي له پلوه نړیوالې وي
دا اندېښنه هغه مهال نوره هم جدي کېږي چې د افغانستان وضعیت ته وکتل شي، چیرې چې د راپورونو له مخې د ترهګرو ګڼ شمېر ډلې فعالیت لري او خوندي پناهځایونه لري. ویل کېږي چې د طالبان تر واک لاندې سیمو کې مختلفې افراطي ډلې خپل شبکې، روزنه او عملیات روان ساتي
رپورټونه دا هم وایي چې القاعده، داعش خراسان او نورې ډلې د نوې ټکنالوژۍ په کارولو سره خپل فعالیتونه پراخوي، چې له امله یې د «ډرټي بم» او اټومي موادو د قاچاق احتمال زیات شوی دی
همدارنګه د تاجکستان د یورانیمو د چور پېښه هم د دې خطر یوه بېلګه بلل شوې، چې ښيي راډیو اکټیو مواد د قاچاق شبکو له لارې افراطي ډلو ته رسېدلی شي
ملګرو ملتونو ټینګار کړی چې د اټومي ترهګرۍ د مخنیوي لپاره نړیوال قانوني همکاري، د معلوماتو تبادله او قوي امنیتي چوکاټونه ضروري دي، او هېوادونه باید ژر تر ژره د نړیوالو کنوانسیونونو برخه شي.