د بلوچستان وزیر اعلیٰ سرفراز بګټي د ملي امنیت او د ترهګرۍ ضد پالیسۍ په اړه ویلي چې ریاست تل د خپلو وګړو لپاره د مور په څېر مهربانه پاتې شوی، خو د هغو ترهګرو او د هغوی د همکارانو لپاره هېڅ ډول نرمښت نه لري چې د هېواد د سالمیت زیانمنولو هڅه کوي. د هغه په وینا د صفر زغم پالیسي به پر ځای پاتې وي
هغه وویل چې ریاست تل هڅه کړې هغه کسان چې د ترهګرو له پروپاګند او دروغجنو روایتونو اغېزمن شوي وي، بېرته ملي بهیر ته راولي او هغوی ته د خوندي او باعزته راستنېدو زمینه برابره کړي. د هغه په خبره دا یوازې د یو فرد پرېکړه نه ده، بلکې د ریاستي ادارو او ملي تګلارې دوامداره برخه ده
سرفراز بګټي زیاته کړه چې ریاست او امنیتي ادارو په بېلابېلو وختونو کې هغو کسانو ته رسېدنه کړې چې د ترهګرو د دروغو او دښمنو پروپاګند ښکار شوي وو، ځکه د ملي ګټو لپاره روغې جوړې او بحالۍ تل د ریاست د تګلارې برخه پاتې شوې ده. خو هغه په څرګندو ټکو وویل چې پاکستان د ترهګرو، د هغوی د همکارانو او بهرنیو ملاتړکوونکو په اړه هېڅ ډول ابهام نه لري.
هغه ټینګار وکړ چې ترهګري یوازې امنیتي مسئله نه ده، بلکې د پاکستان د ثبات او خپلواکۍ پر ضد منظمې نیابتي جګړې برخه ده. د هغه په وینا هغه عناصر چې د ملي امنیت پر ضد وسلهوالې کړنې کوي او د ریاست رټ ننګوي، د هغوی پر ضد اقدام حتمي او نه انکارېدونکی دی
په پای کې هغه وویل چې د چیک پوستو په اړه پخواني اقدامات د خلکو د غوښتنو پر بنسټ شوي وو، څو د هغوی تګ راتګ اسانه شي. سرفراز بګټي ټینګار وکړ چې د پاکستان پالیسي روښانه ده: د ګمراه شویو کسانو د بیا ادغام لپاره فرصت شته، خو د ترهګرۍ لپاره هېڅ ډول زغم نشته