په منځني ختیځ کې د زیاتېدونکي کړکېچ پر مهال د سعودي عرب د فضايي حریم د سرغړونې یوه جدي هڅه شوې ده، چې پکې د عراق له پولې څخه د سعودي خاورې ته ننوتونکي درې وسلهوال ډرونونه د سعودي دفاعي سیستم له خوا په هوا کې له منځه وړل شوي دي
د سعودي د دفاع وزارت په رسمي اعلامیه کې ویل شوي چې د عراق له لوري د سعودي فضايي حریم ته د داخلېدونکو درې مشکوکو ډرونونو پر وخت کشف وشو. د سعودي هوايي دفاع ځواکونو سمدستي او اغېزمن غبرګون وښود او دغه درې واړه ډرونونه یې مخکې له دې چې خپل هدف ته ورسېږي، په هوا کې وویشتل
د دفاع وزارت دغه اقدام د سعودي پر حاکمیت او سیمهییز امنیت ښکاره تېری بللی او ټینګار یې کړی چې سعودي عرب د خپلې خپلواکۍ او ملي امنیت د ساتنې لپاره په مناسب وخت او ځای کې د ځواب ویلو بشپړ حق لري
بل لور ته، سعودي عرب د متحده عربي اماراتو د اټومي بټۍ ترڅنګ د وروستي ډرون برید هم په سختو ټکو غندلی دی. د سعودي د بهرنیو چارو وزارت په بیان کې راغلي چې د متحده عربي اماراتو پر مهمو تأسیساتو د برید هڅې د سیمې د سولې او ثبات لپاره جدي ګواښ دی او دا ډول کړنې د ټولې سیمې امنیت له خطر سره مخ کوي
سعودي عرب ټینګار کړی چې د ورور هېواد متحده عربي اماراتو د امنیت او دفاع په برخه کې په کلکه ملاتړ کوي
د الوتکو او ډرونونو د وروستیو بریدونو له امله سعودي عرب او نورو خلیجي هېوادونو خپل دفاعي سیستمونه په لوړه کچه چمتو کړي، سرحدي څارنه یې لا پیاوړې کړې او د سیمې وضعیت له نږدې څاري.