تهران/واشنګټن: د ایران او امریکا ترمنځ د روان کړکېچ په لړ کې وروستي پرمختګونه ښيي چې په خبرو اترو کې څه اندازه پرمختګ شوی، په واشنګټن کې لوړې کچې غونډې شوې، ایران نوی خبرداری ورکړی او د پاکستان د منځګړیتوب له لارې د امریکا وړاندیزونه ترلاسه شوي، خو وضعیت لا هم نازک بلل کېږي
د محمد باقر قالیباف څرګندونې
د ایران د پارلمان رئیس او د مذاکراتي پلاوي مشر محمد باقر قالیباف په یوه مرکه کې ویلي چې له امریکا سره په خبرو کې پرمختګ شوی، خو لا هم د دواړو هېوادونو ترمنځ “ستر واټن” موجود دی. هغه د امریکا بندیزونه ناعادلانه بللي او وایي چې نورو هېوادونو ته د هرمز تنګي له لارې د تګ اجازه وي، خو ایران ته نه ورکول کېږي، دا د منلو وړ نه ده
هغه زیاتوي چې ایران په څلوېښت ورځنۍ جګړه کې کلک مقاومت وکړ او مقابل لوری خپلو موخو ته ونه رسېد. نوموړي خبرداری ورکړی چې که د امریکا سمندري فعالیتونه زیات شي، ایران به د ځواب ورکولو حق وکاروي
له دې څرګندونو وروسته په واشنګټن کې د امریکا د ولسمشر ډونالډ ټرمپ په مشرۍ د بیړني وضعیت مهمه غونډه وشوه، چې پکې لوړپوړو چارواکو ګډون درلود. په دې غونډه کې له ایران سره خبرې، د هرمز تنګي وضعیت او د اوربند راتلونکی وڅېړل شول راپورونه وایي چې د غونډې پر مهال له ایران او پاکستاني چارواکو سره ټلیفوني اړیکې هم شوې دي
د امریکا بندیزونه او د هرمز تنګي مسله
په همدې حال کې د ایران د بهرنیو چارو مرستیال سعید خطیبزاده ویلي چې د خبرو نوې نېټه به یوازې هغه وخت وټاکل شي چې دواړه هېوادونه پر ګډ چوکاټ هوکړه وکړي
د ایران د سپریم ملي امنیت شورا هم تایید کړې چې د پاکستان د منځګړیتوب له لارې د امریکا نوې وړاندیزونه ترلاسه شوي او اوس تر ارزونې لاندې دي
شورا ویلي چې ایران به هېڅکله د خپلو ملي ګټو قرباني نه کړي او د خلکو حقونه به په بشپړ ډول وساتي. همدارنګه یې د هرمز تنګي په اړه ویلي چې یوازې تجارتي کښتیو ته به محدود او مشروط تګ اجازه وي، او هر ډول سرغړونه به د اوربند خلاف عمل ګڼل کېږي د ایران یو لوړپوړي پوځي چارواکي هم خبرداری ورکړی چې که جګړه بیا پیل شي، نو دا به نړیوالې جګړې ته واوړي
په عمومي ډول شنونکي وایي چې که څه هم ډیپلوماټیک بهیر روان دی او ځینې پرمختګونه شوي، خو اختلافات لا هم ژور دي او راتلونکې ورځې به د دې کړکېچ لپاره ډېرې مهمې وي