اسلامآباد: د پاکستان لومړي وزیر شہباز شریف او د ایران ولسمشر مسعود پزشکیان ترمنځ مهم ټیلیفوني تماس شوی، چې پکې دواړو مشرانو د سیمې پر اوسني وضعیت او روانو ډیپلوماتیکو هڅو تفصیلي خبرې وکړې
د وزیراعظم دفتر د اعلامیې له مخې، دا خبرې شاوخوا ۴۵ دقیقې روانې وې وزیراعظم د ایران له مشرتابه مننه وکړه چې د اپرېل په ۱۱ او ۱۲ نېټه یې اسلامآباد ته د لوړې کچې پلاوی استولی و، چې مشري یې د ایران د پارلمان رئیس محمد باقر قالیباف او د بهرنیو چارو وزیر عباس عراقچی کوله
د سولې او ثبات لپاره ژمنتیا
اعلامیه زیاتوي چې وزیراعظم ایرانی ولسمشر ته د سعودي عرب، قطر او ترکیې په ګډون له نړیوالو مشرانو سره د خپلو وروستیو لیدنو په اړه هم معلومات ورکړل، او ویې ویل چې دا اړیکې په سیمه کې د سولې لپاره د خبرو اترو او ډیپلوماسۍ بهیر پیاوړی کوي. نوموړي د فیلډ مارشال سید عاصم منیر د تهران د وروستي سفر پر مهال له ایراني چارواکو سره پر مثبتو خبرو هم مننه وکړه
شہباز شریف یو ځل بیا ټینګار وکړ چې پاکستان به د خپلو ملګرو هېوادونو په همکارۍ د سیمې د تلپاتې سولې او ثبات لپاره خپلې رښتینې هڅې جاري وساتي. هغه د ایران د ستر مشر لپاره هم نېکې هیلې څرګندې کړې
د سولې او ثبات لپاره ژمنتیا
بل لور ته، د ایران ولسمشر مسعود پزشکیان د پاکستان د سولې هڅې وستایلې او ویې ویل چې د ایران او پاکستان اړیکې به لا پیاوړې شي او دواړه هېوادونه به د سیمې د ثبات لپاره ګډ اقدامات روان وساتي
خو اعلامیه کې دا مهمه خبره هم شوې چې ایران د راتلونکو مذاکراتو لپاره د خپل پلاوي یا د هغه د مشرتابه په اړه هېڅ تفصیل نه دی ورکړی، چې له امله یې په ډیپلوماتیکو حلقو کې بېلابېل اټکلونه روان دي
د شنونکو نظر او منځګړیتوب رول
د شنونکو په وینا، دا اړیکه په داسې وخت کې شوې چې د امریکا او ایران ترمنځ د خبرو بل پړاو ته چمتووالی روان دی او پاکستان یو ځل بیا مهم منځګړی رول لوبوي، خو د ایراني پلاوي د جوړښت په اړه لا هم ابهام موجود دی