له پاکستانه د غیرقانوني مېشت افغان کډوالو د جبري ستنېدو لړۍ چټکه شوې ده، چې د وروستیو شمېرو له مخې یوازې په یوه ورځ کې ۵ زره ۳۶۳ افغان پناه غوښتونکي د پولې له لارې افغانستان ته لېږدول شوي دي. د افغان کډوالو د ستونزو د حل لپاره جوړې شوې عالي کمېټې دا پراخ ایستل تایید کړي دي
د راپور له مخې، د بېرته لېږل شویو کسانو تر ټولو لویه برخه د تورخم له لارې انتقال شوې، چې ۴ زره ۴۶۹ کسان یې جوړوي، په داسې حال کې چې ۵۶۲ کسان د سپین بولدک له لارې افغانستان ته ستانه شوي دي. نور کسان د نورو سرحدي لارو څخه لېږدول شوي دي
د عالي کمېسیون په وینا، بېرته ستانه کړل شوي کډوال ثبت او راجستر شوي او ورته لومړنۍ بشري مرستې او خوراکي توکي هم ورکړل شوي دي. د کمېسیون له مخې، د ټرانسپورټ او لومړنیو اسانتیاوو له برابرېدو وروسته دا کورنۍ خپلو اصلي سیمو ته لېږدول شوي دي
په راپور کې دا هم ویل شوي چې له دې یوه ورځ وړاندې هم ۴ زره ۶۸۵ افغان کډوال له پاکستانه ایستل شوي وو، چې دا ښيي د پولې له لارې د ستنېدو بهیر لا هم په دوامداره توګه روان دی