د هند د لومړي وزیر نریندر مودي د ناروې د سفر (۱۸ او ۱۹ مې ۲۰۲۶) پر مهال په اوسلو کې د کشمیریانو، سکهانو او د پاکستاني ټولنې له لوري د نارویجین پارلمان مخې ته پراخ احتجاجي لاریون ترسره شوی دی. دا احتجاج د تحریک کشمیر ناروې او نورو ډیاسپورا تنظیمونو په ګډه تنظیم شوی و چې پکې شاوخوا ۲۰۰ څخه تر ۲۵۰ کسانو ګډون کړی و
مظاهره کوونکو د هند حکومت (BJP) پر ضد شعارونه ورکړي او د هغوی په وینا د جمو او کشمیر په اړه د بشري حقونو د سرغړونو، د هندو توا ایجنډې او په هند کې د اقلیتونو پر وړاندې د سیاستونو غندنه یې کړې ده. هغوی غوښتنه وکړه چې مودي دې د نړیوالو ادارو له خوا حساب ورکولو ته راکش شي
په احتجاج کې ویناوالو، چې پکې د بېلابېلو ټولنیزو او سیاسي شخصیتونو نومونه شامل وو، د مودي حکومت سخت انتقاد وکړ او ویې ویل چې په کشمیر کې د ملکي وګړو پر ضد اقدامات او د اقلیتونو ځپل د منلو وړ نه دي. مظاهره چیانو سخت شعارونه ورکړل لکه “مودي جواب ورکړه”، “کشمیر ازاد کړه” او “مودي واپس لاړ شه”
همدارنګه سکه فعالانو هم جلا احتجاج وکړ او د خالصتان تحریک ملاتړ یې څرګند کړ. هغوی د مودي د ناروې له لوري د اعزاز ورکولو په اړه اندېښنه وښوده او ویې ویل چې دا د بشري حقونو ضد اقداماتو ته مشروعیت ورکوي. ځینو مظاهره چیانو د خالصتان بیرغونه پورته کړل او د هند بیرغ په اړه یې سخت غبرګون وښود
په ټولنیزو رسنیو کې هم د دې سفر پر ضد پراخ کمپاین روان و، چې پکې د بایکاټ غوښتنه او د بشري حقونو مسایل مطرح شوي وو. د تحریک کشمیر ناروې په وینا دا کمپاین به لا نور هم پراخ شي