اسلاماباد: د پاکستان د لومړي وزیر مرستیال او د بهرنیو چارو وزیر اسحاق ډار د یوې مهمې سفارتي بریا اعلان کړی، چې له مخې یې د امریکا له لوري نیول شوي یوه سمندري بېړۍ کې موجود ۱۱ پاکستانیان په خوندي ډول بېرته هېواد ته راوستل شوي دي. په دې عملیاتو کې پاکستان نه یوازې خپل اتباع، بلکې د ایران ۲۰ نور بندیان هم خوشې کړي دي
د دغو ۳۱ کسانو د بېرته ستنېدو په لړ کې د سنګاپور حکومت مهم او نږدې همکاري کړې ده. ټول کسان اوس د خپل هېواد د سفر په لاره دي. د ټاکل شوي پلان له مخې هغوی له سنګاپور وروسته د تایلنډ پلازمېنې بنکاک ته رسېدلي، چې له هغه ځایه پاکستانی مسافرین د اسلاماباد پرواز ته سپاره شوي دي
اسحاق ډار د سنګاپور له حکومت، لومړي وزیر او د بهرنیو چارو وزیر څخه ځانګړې مننه کړې او د دې پېچلي سفارتي مسلې په حل کې یې د هغوی رول مهم بللی دی. همدارنګه یې د امریکا د بهرنیو چارو وزیر مارکو روبیو څخه هم د همکارۍ له امله مننه کړې چې د دې کسانو د ژر خوشې کېدو لاره یې هواره کړه
نوموړي زیاته کړې چې د ایران د بهرنیو چارو وزیر عباس عراقچي هم د پاکستان له سفارتي هڅو سره بشپړ همغږي ښودلې، او پاکستان به د ایرانیانو د تهران ته ستنېدو لپاره هم ټولې لازمې اسانتیاوې برابرې کړي