اسلام آباد: د کورنیو چارو د قائمې کمېټې په غونډه کې دا انکشاف شوی چې د تحریک انصاف د قومي اسمبلۍ غړي اقبال آفریدی زوی په ایټالیا کې د سیاسي پناه ترلاسه کولو هڅه کوي. د راپورونو له مخې، هغه د “بلو پاسپورټ” پر مټ بهر ته سفر کړی او هلته یې د اسایلم غوښتنه ثبت کړې ده. کله چې خبریالانو په دې حساس موضوع پوښتنې وکړې، د پی ټي آی مشرانو د ځواب پر ځای غوسه وښوده او د هېواد د حالاتو شکایتونه یې پیل کړل
په قومي اسمبلۍ کې د اخلاقو درس ورکونکې قیادت دا دوهګونی معیار په سیاسي حلقو کې نوې بحثونه راپورته کړي دي. یو طرف هغه په همدې ایوان کې له خپلو همکارو سره په شخړو کې ښکېل لیدل کېږي او بل طرف د کورنۍ پر ضد د دولتي امتیازاتو د ناوړه استفادې او هېواد پرېښودو تورونه لګېږي. دا هم څرګنده شوې چې اقبال آفریدی خپله هم د سیاسي پناه په اړه څرګندونې کړې او ویلي یې دي چې “دا هېواد نور د ژوند کولو وړ نه دی”
سیاسي شنونکي دا عمل ښکاره منافقت بولي، چې یو ولسي استازی هم د پارلمان له امتیازاتو ګټه اخلي او هم د ریاست ضد بیانیه وړاندې کوي. عام ولس ته د احتجاج او زندان لارې ښودونکي مشران، خپلو اولادونو ته د “بلو پاسپورټ” او بهر خوندي راتلونکې لټوي، چې دا د اشرافي سیاست یوه ښکاره بېلګه ګڼل کېږي
د ولسي استازي په توګه اقبال آفریدی ته پکار وه چې په دې اړه روښانه او شفاف ځواب ورکړي، ځکه د دولتي پاسپورټ په کارولو سره د پناه غوښتنه د منصب سپکاوی بلل کېږي. د خبریالانو پر پوښتنو چوپتیا او شورماشور دا شکونه لا زیاتوي چې پټه خبره شته. کله چې مشران خپله له هېواد څخه ناامیده شي او د پناه لارې لټوي، نو بیا ولس ته د پرمختګ او شفافیت درس څنګه ورکولای شي. دا قضیه د هغه سیاست یوه بله بېلګه ګڼل کېږي چې پکې له هېواد ګټه اخیستل کېږي او بیا یې پر ضد بیانیه جوړېږي