په ټولنیزو رسنیو هغه ادعاوې چې د سډني د بونډي ساحل وروستۍ مرګونې د ډزو پېښه یې له یوه پاکستاني وګړي، نوید اکرم، سره تړلې ده، ناسمې ثابتې شوې دي، ځکه چې د اسټریلیا چارواکو تر اوسه نه د بریدګر هویت اعلان کړی او نه یې هم د هغه تابعیت تایید کړی دې
د پېښې له رامنځته کېدو وروسته، د ټولنیزو رسنیو ځینو هندي اکاونټونو په ناسم ډول دا برید یوه پاکستاني وګړي ته منسوب کړ او د مشکوک بریدګر په نوم یې انځورونه خپاره کړل. خو ډیجیټلي څېړنو او عامه وضاحتونو ښودلې چې دغه خپرېدونکي انځورونه له پېښې سره هېڅ تړاو نه لري.
د شیخ نوید په نوم یو کس، چې ځان د لاهور اوسېدونکی معرفي کوي، پر فېسبوک یې وضاحت خپور کړی او ویلي یې دي چې د ده انځور په ناسم ډول د جعلي معلوماتو د خپرولو لپاره کارول شوی دی. نوموړي له خلکو وغوښتل چې دغه جعلي مواد راپور کړي او له بېتاییده معلوماتو د خپرولو ډډه وکړي
په ټولنیزو رسنیو کې خپاره شوي انځورونه او د هغوی څېړنه ښيي چې په انځور کې کس یو روغ رمټ باډي بلډر ښکاري، چې دا کار دا شک نور هم پیاوړی کوي چې دغه انځور د بریدګر نه دی. تر دې دمه، د اسټریلیا پولیسو په هېڅ رسمي بیان یا د پلټنو په راپور کې د نوید اکرم په نوم کوم کس د بانډي بېچ د برید له پېښې سره نه دی تړل شوی
د پاکستان غندنه او د یووالي څرګندونه
پاکستان د بونډي ساحل پر ترهګریز برید ژور خپګان او خواشیني څرګنده کړې ده، د کورنیو چارو وزیر محسن نقوي په یوه بیان کې ویلي چې پاکستان له دې ترهګریزې پېښې سخت خواشینی دی او د اسټرالیا له حکومت، ولس او په ځانګړي ډول له ټپیانو سره بشپړ یووالی څرګندوي
هغه وویل چې ترهګري د انسانیت پر ضد نه بښونکی جرم دی او پاکستان دا درد په ښه ډول پیژني چې له امله ی دا برید په کلکه غندي
ځینو اسټریلیا رسنیو راپور ورکړی چې هم بریدګر او هم هغه کس چې د وسلې د اخیستو هڅه یې کړې وه، مسلمانان دي او نومونه یې نوید اکرم او احمد الحمد ښودل شوي دي. د راپورونو له مخې، یو انځور د بریدګر او بل د هغه کس ښيي چې د وسلې د نیولو پر مهال ټپي شوی و. خو دا معلومات لا هم بېتاییده دي او د قانون پلي کوونکو ادارو له خوا نه دي تایید شوي
ځینې نور ناتایید شوي راپورونه دا هم وایي چې ښايي بریدګر د لبناني اصل لرونکی وي، خو اسټریلیا چارواکو دا ادعا هم نه ده تایید کړې
چارواکو دا پېښه د پرمختګ په حال کې بللې او ټینګار یې کړی چې پلټنې لا هم روانې دي. هغوی له خلکو غوښتي چې له اټکلونو، افواهاتو او ناسم معلوماتو د خپرولو ډډه وکړي. د رسنیو شنونکي خبرداری ورکوي چې د بریدګر د هویت او تابعیت له وخته مخکې تړل کولای شي د ناسم معلوماتو کمپاینونه او ټولنیز تاوتریخوالی زیات کړي، په ځانګړي ډول هغه وخت چې رسمي پلټنې لا پای ته نه وي رسېدلې