د امریکا د فدرالي تحقیقاتي ادارې (FBI)، د عدلیې وزارت او کاناډايي چارواکو د ‘764’ په نوم یو آنلاین شبکه د ترهګریزې ډلې په توګه اعلان کړې ده. دغه شبکه د ډسکارډ، روبلوکس او ماینکرافټ په څېر مشهورو ګیمینګ پلیټفارمونو کې ۹ کلن او تر هغه هم کم عمره ماشومان په نښه کوي
له ټیکساسه تر نړیوال خپرېدو پورې
رپورټونه وایي چې دا شبکه په ۲۰۲۱ کې د امریکا د ټیکساس ایالت د یو ۱۵ کلن هلک له خوا پیل شوې وه، خو په څو کلونو کې په نړیواله کچه پراخه شوې ده. د FBI په وینا، تر اوسه د دې شبکې پر ضد له ۲۵۰ څخه زیاتې څېړنې روانې دي، او په ۸ هېوادونو کې د اختطاف، جنسي تېري او قتل په تور نیونې شوې دي
د کار کولو سخت او خطرناک طریقه
څېړنې ښيي چې د دې شبکې غړي هغه ماشومان هدف ګرځوي چې یوازېتوب یا ذهني فشار کې وي. دوی لومړی جعلي ملګرتیا جوړوي، بیا د ماشومانو حساس انځورونه ترلاسه کوي او وروسته یې بلیکمیل کوي. له دې لارې ماشومان مجبوروي چې ځان ته زیان ورسوي، پر حیواناتو تشدد وکړي او آن غیر اخلاقي لایف ویډیوګانې جوړې کړي
د والدینو لپاره خبرداری
امنیتي ادارې او رواني کارپوهان والدینو ته خبرداری ورکوي چې د دې شبکې غړي د ماشومانو له تاوتریخوالي ډکې ویډیوګانې د خپل شبکې د لوړ مقام لپاره کاروي. والدین باید د خپلو ماشومانو آنلاین فعالیتونه، په ځانګړي ډول د ګیمینګ او سوشل میډیا استعمال، په جدي ډول وڅاري ترڅو ماشومان له دې نړیوال خطره خوندي پاتې شي