ډهاکه: د پاکستان او بنګلهدېش ترمنځ د لومړۍ ټېسټ لوبې په څلورمه ورځ د لوبې تر پای پورې کوربه لوبډلې په دویمه اننګز کې د ۳ ویکټو په زیان ۱۵۲ منډې جوړې کړې او خپل موقف یې پیاوړی کړ. بنګلهدېش اوس د پاکستان پر وړاندې ټولیزه ۱۷۹ منډې برتري لري، او لا هم د لوبې یوه ورځ پاتې ده
په څلورمه ورځ بنګلهدېشي اوپنرانو محتاط پیل وکړ، خو محمد عباس ژر پاکستان ته لومړۍ بریا ورکړه او محمود الحسن جوې یې په ۱۵ منډو وسوځاوه. وروسته شادمان اسلام هم یوازې ۱۰ منډې جوړې کړې او د حسن علي په بال آوټ شو، چې بنګلهدېش یې ۲۳ منډو کې د ۲ ویکټو له لاسه سره له ستونزې سره مخ کړ
په دې حساس وخت کې کپتان نجمالحسین شانتو او مومن الحق د مسؤلانه توپ وهنې له لارې ۱۰۵ منډې ملګرتیا وکړه او لوبډله یې له کړکېچ څخه راویسته. مومن الحق ۵۶ منډې جوړې کړې او د شاهین شاه آفریدی ښکار شو، خو شانتو ۵۸ او مشفق الرحیم ۱۶ منډو سره ناټ آوټ پاتې شول. د باران له امله نږدې درې ساعته لوبه هم وځنډېده
په لومړۍ اننګز کې بنګلهدېش د شانتو د ۱۰۱ منډو او مومن الحق د ۹۱ منډو په مرسته ۴۱۳ منډې جوړې کړې. د پاکستان له خوا محمد عباس ۵ ویکټې واخیستې. په ځواب کې پاکستان په خپله لومړۍ اننګز کې ۳۸۶ منډې جوړې کړې، چې پکې اذان اویس ۱۰۳ او عبدالله فضل ۶۰ منډې وکړې. بنګلهدېش ته د مهدي حسن میراز د ۵ ویکټو له امله ۲۷ منډې برتري په لاس ورغله. اوس د پنځمې ورځې لوبه د دواړو لوبډلو لپاره ډېره مهمه او پرېکړه کوونکې بلل کېږي.