میجر جنرال احمد شریف چوهدري د “معرکة الحق” د یو کال پوره کېدو په مناسبت مهمې خبري غونډې ته وینا وکړه۔ هغه وویل، د پاهلګام پېښې یو کال تېرېدو باوجود هند تر اوسه کوم کره ثبوت وړاندې نه کړای شو۔ ډي جي آی اېس پي آر پوښتنه وکړه چې که د هند استخبارات دومره قوي وو، نو د سلګونو کیلومټرو دننه د شوې پېښې مخکینی معلومات ولې نه وو ترلاسه شوي؟ نوموړي زیاته کړه چې د “معرکة الحق” وروسته د هند د لسیزو زوړ د ترهګرۍ “ډرامه” تل لپاره پای ته رسېدلې ده۔
د پاکستان مسؤلانه چلند
احمد شریف چوهدري وویل، د کړکېچ پر مهال پاکستان له زغم او مسؤلیت څخه کار واخیست ترڅو حالات نور خراب نه شي۔ هغه د هند پر پوځي مشرتابه نیوکه وکړه چې د خپلو سیاسي مشرانو بیانیه یې پر مخ وړله، خو د پاکستان وسله والو ځواکونو بشپړ مسلکي چلند غوره کړی و۔ د هغه په خبره، هند ځان د سیمې “سکیورټي پرووایډر” ښودلو هڅه کوله، خو نړۍ ولیدل چې د سیمې ثبات چا ته لومړیتوب لري۔
د نوې جګړې بدل شوي اړخونه
ډي جي آی اېس پي آر وویل، اوسنۍ جګړه یوازې تر دودیزو سرحدونو محدوده نه ده، بلکې سایبر، معلوماتي جګړې او د انسانانو ذهنونو ته هم غځېدلې ده۔ هغه ټینګار وکړ چې پاکستان د دغو څو اړخیزو چیلنجونو پر وړاندې کلک مقاومت کړی او په هر ډګر کې یې خپله برتري ثابته کړې ده۔ نوموړي څرګنده کړه چې د پاکستان پر خپلواکۍ هېڅ ډول معامله نه کېږي او هر ډول تېري ته به سخت ځواب ورکول کېږي۔
په افغانستان کې د ترهګرو شبکې
احمد شریف چوهدري وویل، پاکستان په افغانستان کې د ترهګرو شبکو پر ضد عملیاتو ته اشاره کړې او د هغوی د ختمولو لپاره یې اقدامات کړي دي۔ د هغه په وینا، د ترهګرۍ اړیکې د افغان خاورې له استعمال سره تړلې دي۔
هغه زیاته کړه چې پاکستان تل خبرو اترو او ډیپلوماټیکو هڅو ته لومړیتوب ورکړی او دا دریځ یې خپل کړی چې د هېڅ هېواد خاوره باید د بل هېواد پر ضد ونه کارول شي۔ د هغه په خبره، د پاکستان اقداماتو د سیمې امنیتي وضعیت ښه کړی او د ځواک توازن یې هم اغېزمن کړی دی۔
د هند کورني حالات او تضادونه
په خبري غونډه کې نوموړي د هند داخلي ستونزې او له اقلیتونو سره ناسم چلند هم یاد کړ۔ هغه وویل، هند د خپل داخلي ګډوډۍ، د منی پور وضعیت او په کشمیر کې د بشري حقونو سرغړونو څخه د پام اړولو لپاره پر پاکستان تورونه لګوي۔ ډي جي آی اېس پي آر ادعا وکړه چې د “معرکة الحق” پر مهال، کله چې هند له ناکامۍ سره مخ شو، نو د ځینو افغان چارواکو له لارې یې د مرستې هڅه وکړه، چې دا د هندوتوا او افراطي ډلو ترمنځ اړیکې څرګندوي۔
ملي یووالی او راتلونکی عزم
په پای کې نوموړي د ملت یووالی وستایه او ویې ویل چې “معرکة الحق” ثابته کړه چې ملت، مشرتابه او وسله وال ځواکونه ټول په یوه دریځ ولاړ دي۔ هغه د پاکستان د بنسټګر وینا ته په اشارې وویل چې د پاکستان پر ضد هېڅ سازش بریالی کېدای نه شي۔ نوموړي ټینګار وکړ چې پاکستان په سیمه کې د سولې غوښتونکی دی، خو د خپلې امنیت او خپلواکۍ د ساتنې لپاره هر وخت چمتو دی۔
ډیورنډ کرښه او نوې بدلونونه؛ د سرحدي سیمو د سیاسي او امنیتي معادلې بدلون