افغانستان کې د طالبانو حکومت د تحریک طالبان پاکستان (ټي ټي پي) مشرتابه او لوړ پوړو کمانډرانو ته امر کړی چې له کابل څخه ووځي او د هېواد جنوبي سیمو ته انتقال شي. د ریډیو فری یورپ د راپور له مخې دا اقدام د پاکستان سره د زیاتېدونکې پوځي کړکېچ د کمولو لپاره شوی دی
د ټي ټي پي سرچینو هم منلې چې د منځني او لوړ پوړ کمانډران له کابل څخه وتلي او یا د وتلو په حال کې دي، او د کابل په جنوب کې نامعلومو سیمو ته لېږدول کېږي. دا لړۍ یوازې ټي ټي پي پورې محدوده نه ده، بلکې د ایغور وسله والې ډلې “ترکستان اسلامک پارټي” او د القاعده پاتې عناصر هم پکې شامل دي
راپور زیاتوي چې دا مهمه پرېکړه د اپرېل په پیل کې د چین په ارومچي ښار کې د درې اړخیزو مذاکراتو وروسته شوې، چې پکې پاکستان او چین پر افغان طالبانو فشار راوړی و څو د خپلې خاورې دننه د بهرنیو وسله والو ډلو مسئله حل کړي. پاکستان اوږده موده دا دریځ لري چې ټي ټي پي د افغان خاورې څخه د پاکستان پر ضد بریدونو لپاره استفاده کوي
ارومچي مذاکرات او سیمه ییز فشار
د وروستیو میاشتو په ترڅ کې د پاکستان او افغانستان اړیکې ډېرې ترینګلې شوې دي. د فبرورۍ او مارچ د هوايي بریدونو وروسته دواړه هېوادونه د جګړې تر حده ورسېدل. د راپورونو له مخې د کابل پر یو روغتون برید کې درنه مرګ ژوبله هم شوې وه، چې وضعیت یې لا کړکېچن کړ
راتلونکی وضعیت
اوس د کابل له لوري دا انتقال امر د ټي ټي پي لپاره لوی فشار بلل کېږي، که څه هم طالبان او ټي ټي پي تاریخي او ایدیولوژیک اړیکې لري، خو نړیوال فشار او اقتصادي ستونزې طالبان اړ کړي چې احتیاطي دریځ غوره کړي. شنونکي وايي دا ګام ممکن لنډمهاله کړکېچ کم کړي، خو د ټي ټي پي د بشپړ ختمېدو په اړه لا هم شکونه موجود دي