د ملګرو ملتونو عمومي منشي انتونیو ګوتېرېش د امریکا د ولسمشر له لوري د اوربند د مودې د غځېدو اعلان هرکلی کړی او دا یې په سیمه کې د تاوتریخوالي د کمېدو په لور یو مهم پړاو بللی دی ملګرو ملتونو په دې حساس وخت کې د پاکستان د فعال ډیپلوماتیک رول او د منځګړيتوب هڅو بشپړ ملاتړ هم بیا تائید کړی دی
د پاکستان مهم رول
د ملګرو ملتونو عمومي منشي په خپل ځانګړي بیان کې ویلي چې د خبرو اترو د اسانتیا په برخه کې د پاکستان رول ستایي. هغه هیله څرګنده کړې چې د پاکستان دا مخلصانه هڅې به د ایران او امریکا ترمنځ د یو جامع او دوامدار حل لپاره لار هواره کړي، څو وضعیت د تلپاتې سولې او ثبات لوري ته لاړ شي
د ډیپلوماسۍ لپاره نوی فرصت
د ملګرو ملتونو ویاند سټیفن دوجارک ویلي چې د اوربند دا غځېدل د ایران او امریکا ترمنځ د باور جوړونې او ډیپلوماسۍ لپاره یو نادر فرصت برابر کړی دی.د ملګرو ملتونو دفتر له ټولو اړخونو غوښتي چې دا مثبت پرمختګ پر مخ یوسي، له پاروونکو کړنو ډډه وکړي او د اوربند بشپړ درناوی یقیني کړي
رغنده مذاکرات
د ملګرو ملتونو مشر له ټولو اړخونو غوښتي چې له دې فرصت څخه په ګټه اخیستنې سره په خبرو اترو کې مثبت او رغنده رول ولوبوي. هغه ویلي چې په اوسنیو شرایطو کې د ټولو اړخونو مسوولیت دی چې له هغو کړنو ډډه وکړي چې د سولې هڅې زیانمنې کړي
یادونه کېږي چې پاکستان له تېرو څو میاشتو راهیسې په سیمه کې د احتمالي لویې نښتې د مخنیوي لپاره ښکاره او پټې ډیپلوماټیکې هڅې کوي، چې اوس یې مثبتې پایلې د نړیوالې اوربند او خبرو اترو په بڼه څرګندې شوې دي