د ملي سایبر جرمونو د څېړنې ادارې، این سي سي آیی اې، د پاکستان تحریک انصاف د رسنیو د ټیم پر یوه غړي تور لګولی چې د دولتي ادارو پر ضد یې ، سپکونکي او ګمراه کوونکي څرګندونې کړې دي او پر ټولنیزو رسنیو یې خپرې کړې دي۔
د رسمي راپور د پلټنې شمېره ۲۲۸۷/۲۰۲۵ له مخې، چې د سایبر جرم راپور ورکولو مرکز اسلام آباد لخوا خپور شوی، تورن محمد سهیل چې د محمد ستار زوی او د شلوبر قمبر خېل اوسېدونکی دی، باړه خېبر او نورو کسانو سره یو ځای، په قصد او اراده سره د بد نیتي پر بنسټ د پاکستان د دولتي ادارو پر ضد بې بنسټه تورونه لګولي دي
په ایف آی آر کې ویل شوي چې یاد ویډیو د تحریک انصاف رسمي یوټیوب چینل او نورو ټولنیزو رسنیو له لارې خپره شوې وه۔ په دې ویډیو کې چې عنوان یې دی “د خیبر پښتونخوا وزیر اعلی محمد سهیل افریدی د اډیاله زندان نه بهر خبرې”، داسې څرګندونې شوې چې “درواغجنې، جعلي او بد نیت لرونکې” بلل شوې دي
چارواکي وایي، تورن کسانو هڅه کړې چې د خلکو اعتماد پر دولتي ادارو کم کړي، د نفرت، ګډوډۍ او وېري فضا رامنځته کړي۔ راپور زیاتوي چې یاد کسان د جعلي او غلطو موادو په خپرولو، شریکولو او خپرېدو کې ښکېل دي، څو د دولت ضد احساسات را وپاروي او ملي امنیت ګډوډ کړي
د پلټنو له پای ته رسېدو وروسته، پر تورنو کسانو د “د الکترونیکي جرمونو د مخنیوي قانون پیکا ایکټ ۲۰۱۶ د ۱۱، ۲۰ او ۲۶-اې مادو لاندې قضیه ثبت شوې ده۔ د دې قضیې د څېړنې مسؤلیت د ملي د سایبر جرم راپور ورکولو مرکز د سب انسپکټر وسیم خان ته سپارل شوی او د ایف آی آر کاپۍ هم اړوندو ادارو ته استول شوې دي
نورخبرونه
د خیبر پښتونخوا پولیس شهیدان کیږي او وزیراعلی له وفاق څخه د بم ضد موټرو اخستلو انکار کوي
وزیراعلی خیبر پښتونخوا دې اولسي ستونزو ته پام وکړي
د پاکستان تحریک انصاف سهیل افریدي وزیراعلی خیبر پښتونخوا جوړیدې شي که نه؟