پېښور: د امارت اسلامي افغانستان له لوري د پاکستان پر ضد د کالعدم تحريک طالبان پاکستان د ملاتړ او همکارۍ کولو په اړه لوی ثبوت او شواهد مخې ته راغلي دي. د باوري سرچينو له مخې، د افغان استخباراتو يو ليک څرګندوي چې د افغانستان ځينې چارواکي د ټي ټي پي يو مهم غړی ابوبکر عرف عمر آفريدي او د هغه ۲۵ ملګري د پاکستان قبایلي سيمې باجوړ ته د داخلېدو لپاره لارښوونې کړې دي.
د ترکي خبري اژانس “ترکیه اردو” په خپل راپور کې دعوه کړې چې دا ليک د امارت اسلامي د استخباراتو له خوا صادر شوی، او پکې په څرګنده توګه ليکل شوي چې د تحریک طالبان پاکستان جنګيالو ته د پاکستاني پولو دننه د ځانګړو ترهګريزو عملياتو ترسره کولو اجازه ورکړل شوې ده.
سرچينو دا هم ويلي چې دغه ليک د افغانستان د شمالي ولايت کنړ څخه صادر شوی، او پکې طالب کمانډرانو ته امر شوی چې ابوبکر آفريدي او د هغه ملګرو ته ټولې اړينې اسانتياوې برابرې کړي، څو هغوی پرته له کوم خنډه د پاکستان قبایلي سيمو ته ورسېږي.
د پاکستان امنيتي شنونکو دا پرمختګ “ډېر د اندېښنې وړ” بللی، او زياته کړې يې ده چې دا کار د هغه ژمنې ښکاره سرغړونه ده چې امارت اسلامي د افغانستان له خاورې د ترهګرۍ د نه کارونې په اړه کړې وه.
دا انکشاف په داسې وخت کې شوی چې د پاکستان او افغانستان تر منځ په وروستيو اوونيو کې اړيکې تر پخوا زياتې ترینګلې شوي دي، په ځانګړي ډول د سرحدي ترهګرۍ، د افغان کډوالو د ستنېدو، او د متقابل اعتماد د کموالي په اړه د پاکستان او افغان طالبانو حکومت ترمنځ اړیکې خرابې شوي دي
سره له دې چې د دوحې او استنبول د خبرو له امله اوس مهال يو ډول اوربند ډوام لری خو د دې ډول پېښو راښکاره کېدل د سولې د روانو هڅو او راتلونکو مذاکراتو لپاره جدي ګواښ ګڼل کېږي
شنونکي وايي که د امارت اسلامي په صفونو کې رښتيا هم داسې عناصر شته چې د کالعدم ټي ټي پي ملاتړ کوي، نو دا به نه يوازې د پاکستان، بلکې پخپله د افغانستان د امنيت لپاره هم په یو ډیر یو لوی زیان تمام شي ځکه دا کار به په سیمه کې د نوې ترهګرۍ څپه رامنځته کړي
پاکستاني چارواکو د پخوا وخت په څیر يو ځل بيا له افغان حکومت څخه غوښتنه کړې چې خپله خاوره د هر ډول ترهګرې ډلې له استفادې وساتي، او د دوه اړخيزو امنيتي تړونونو پوره عملي کول باوري کړي ، د افغان طالبان حکومت له لوری دې لیک په اړه هیڅ کوم غبرګون مخې له نه دې راغلې
نورخبرونه
د ټي ټي پي پخوانۍ نایب امیر قاري امجد په باجوړ کې له منځه وړل شوې