واشنګټن: د سپینې ماڼۍ ویاندې کارولین لیویټ د ایران او امریکا ترمنځ روانو مذاکراتو کې د پاکستان رول ستایلی او ویلي یې دي چې پاکستان د اغېزمن او یوازیني منځګړي په توګه راڅرګند شوی، او د خبرو اترو بل پړاو هم ښایي په اسلاماباد کې وشي.
د سپینې ماڼۍ څرګندونې
هغې وویل: “پاکستانیانو په دې بهیر کې غوره منځګړیتوب کړی او موږ د دوی هڅې او دوستي ستایو.” هغې زیاته کړه چې که څه هم نورو هېوادونو هم د رول وړاندیز کړی، خو دا مهال خبرې یوازې د پاکستان له لارې مخ ته ځي.
د امریکا دریځ
د سپینې ماڼۍ په وینا، د امریکا ولسمشر ډونلډ ټرمپ د ایران سره د اړیکو دوام د پاکستان له لارې مهم ګڼي، او مذاکرات روان او ګټور بلل شوي دي
د اوربند او راتلونکي پړاو امکان
کارولین لیویټ وویل چې د اوربند لپاره د پاکستان جدي هڅې د قدر وړ دي او راتلونکی پړاو ښایي په اسلاماباد کې ترسره شي. هغې دا خبره هم رد کړه چې امریکا د اوربند د غځولو غوښتنه کړې ده
هغې زیاته کړه چې د هرمز تنګي تړل عملي شوي او د ایران له بندرونو څخه روانو کښتیو پر ضد اقدامات شوي، او د چین ولسمشر ډاډ ورکړی چې هېواد یې ایران ته وسلې نه ورکوي
د مذاکراتو دوهم پړاو
د سرچینو له مخې، د مذاکراتو دوهم پړاو ښایي راتلونکې اوونۍ په پای کې په اسلاماباد کې وشي، چې امنیتي او اداري چمتووالی ورته پیل شوی. ویل کېږي چې د امریکا پلاوي مشري به مرستیال ولسمشر جې ډي وینس کوي، او د ایران له لوري به سپیکر باقر قالیباف او د بهرنیو چارو وزیر عباس عراقچي ګډون وکړي
د ایران رسمي دریځ
بل لور ته، د ایران د بهرنیو چارو وزارت ویاند اسماعیل بقایي ویلي چې تر اوسه د مذاکراتو کومه وروستۍ نېټه نه ده ټاکل شوې، خو اړیکې روانې دي
یاده دې وي چې د ایران او امریکا ترمنځ د خبرو لومړی پړاو د اپرېل په ۱۱مه په اسلاماباد کې ترسره شوی و، چې شاوخوا ۲۱ ساعته یې دوام وکړ، خو بې له وروستي تړونه پای ته ورسېد، که څه هم امریکایي چارواکو پکې د مثبت پرمختګ یادونه کړې ده