د خیبر پښتونخوا د هنګو ولسوالۍ په بختو ټاپ سرکي او چمبه ګل سیمو کې د پولیسو او وسلهوالو ترمنځ په سختو نښتو کې ۸ وسلهوال وژل شوي او ګڼ شمېر نور ټپیان شوي دي.
د کوهاټ د ریجنل پولیس افسر (آر پي او) عرفان طارق له مخې، دا نښتې وروسته له هغې پیل شوې چې په یادو سیمو کې د وسلهوالو د شتون معلومات ترلاسه شول او عملیات ترسره شول
د پولیسو د ویاند په وینا، د نښتې پر مهال یو پولیس سرتېری د شهیدۍ لوړ مقام ته رسېدلی، او یو بل سرتېری ټپي شوی دی چې روغتون ته لېږدول شوی دی
آر پي او کوهاټ ویلي چې پولیسو له تېرو څو ساعتونو راهیسې د وسلهوالو پر ضد کلابندي تنگه کړې او په سیمه کې د پاکسازۍ عملیات لا هم روان دي
امنیتي چارواکو ویلي چې یادې سیمې محاصره شوې دي او د وسلهوالو ممکنه پټنځایونه په نښه کېږي. د عملیاتو هدف دا دی چې سیمه له ناامنه عناصرو پاکه شي او د امن او نظم وضعیت ټینګ وساتل شي. چارواکو ټینګار کړی چې د ترهګرۍ تر بشپړ ختمېدو پورې به عملیات دوام ولري