د پاکستان دفاع وزیر خواجه محمد آصف له لوري د پاکستان او افغان طالبانو ترمنځ د استنبول خبرو په اړه خبر مخې ته راغلې ده، دفاع وزیر ویلي دي چې د پاکستان او افغانستان ترمنځ خبرې په ځایی اودریدلی او نور د مذاکراتو کوم پلان نشته
د پاکستان د دفاع وزیر خواجه آصف ویلي، دا مهال د پاکستان او افغانستان ترمنځ خبرې اترې په ځای ولاړی دی ، او د راتلونکي پړاو لپاره هېڅ ډول پروګرام نشته. نوموړي زیاته کړه، زموږ تش لاس بېرته ستنېدل دا څرګندوي چې اوس منځګړي هم له افغانستانه ناهیلي شوي دي
خواجه آصف په خپل بیان کې وویل، موږ د ترکیې او قطر منندویه یو، هغوی په اخلاص سره د منځګړیتوب رول ادا کړ، او دواړه هېوادونه د پاکستان له دریځ څخه ملاتړ کوي.
دفاع وزیر څرګنده کړه چې د پاکستان او افغانستان ترمنځ د استنبول خبرې اوس بشپړ بندې شوې دي، او د خبرو د راتلونکي پړاو لپاره هېڅ امکان نشته
هغه وویل، د افغان پلاوي غوښتنه دا وه چې د هغوی خبرو ته یوازې لفظي اعتبار ورکړل شي، خو دا د منلو وړ نه وه، ځکه په نړیوالو مذاکراتو کې وروستۍ پرېکړې تل په لیکلي بڼه کېږي. د ده په وینا، افغان پلاوی زموږ له دریځ سره موافق و، خو د لیکلې ژمنې ورکولو ته تیار نه و.
خواجه آصف زیاته کړه، اوس خبرې پای ته رسېدلې دي، او منځګړي هم له دې پروسې لاس پر سر شوي دي. که هغوی ته لږه هم هیله پاتې وای، نو موږ ته به ی ویلي وای چې انتظار وباسئ، خو داسې ونه شول، نو دا څرګندوي چې هغوی د کوم مثبت پرمختګ تمه نه کوي
نوموړي وویل، زموږ تش لاس بېرته ستنېدل دا څرګندوي چې اوس منځګړي هم له افغانستانه امید نه لري، د پاکستان دفاع وزیر ټینګار وکړو که له افغان خاورې څخه پر پاکستان برید وشي، موږ به د هغې مطابق غبرګون وښیو.
دفاع وزیر دا هم وویل، که له افغان خاورې هېڅ عمل ونه شي، نو د پاکستان لپاره اوربند پر خپل حال پاتې دی؛ خو که د افغانستان له لوري د اوربند سرغړونه وشي، نو موږ به پرې اغېزناک او مناسب غبرګون وښیو. د پاکستان یوازینی غوښتنه دا ده چې د افغانستان له خاورې څخه پر پاکستان بریدونه ونشي. یاده دې وي چې پرون د پاکستان او افغان طالبانو ترمنځ د استنبول د خبرو درېیم پړاو پیل شوی و، خو دغه خبرې د اختلافاتو له امله پرته له کومې پایلې پای ته ورسیدلې
نورخبرونه: د پاکستان او افغان طالبانو ترمنځه استنبول مذاکرات بېپایلې پای ته رسېدلي