پاکستان او بنګله ديش يوبل ته نور هم رانزدې شويدي ، د دواړو ملکونو اړيکو پراختيا لپاره وزيراعظم شهباز شريف او د بنګله ديش چيف ايډوائزر پروفيسر محمد يونس ترمينځ نيويارک کښې مهم ملاقات شوېدے ۔ دا ملاقات د متحده قامونو د جنرل اسمبلۍ اجلاس په سائيډ لائن شوېدے ۔ ملاقات په ډير ښه ماحول کښې شوي وو او دواړو مشرانو د پاکستان او بنګله ديش ترمينځ تعلقات مضبوطولو او تجارت بشمول مختلف شعبو کښې همکارۍ په معاملو خبري کړيدي ۔ د ملاقات په مهال د منطقې او مينځني ختيځ په صورتحال هم غور شوېدے او دواړو مشرانو د منطقې امن او استحکام لپاره په شريکه کردار ادا کولو باندي زور راوړېدے ۔ د ملاقات په پائې کښې دواړو مشرانو په دې اتفاق کړېدے چې د پاکستان او بنګله ديش ترمينځ موجوده تعلقات نور هم ښه کولو لپاره به د رابطو او ملاقاتونو دا سلسله جاري وي ۔ دا ملاقات په داسې ماحول کښې شوېدے چې د مينځني ختيځ په معاملو او په خصوصي توګه مسلمان ملکونو باندې اسرائيلي جارحيت کښې اضافه راتلو وروستو پاکستان د منطقې امن لپاره خپل کردار ادا کوي،هم دې سلسله کښې سعودي عرب د پاکستان سره تاريخي دفاعي معاهده کړيده چې ترمخه به ئې پاکستان د حرمين الشرفين سيکيورټۍ کښې اوس د سعودي عرب برابر شراکت دار وي ۔ تيره ورځ د متحده قامونو جنرل اسمبلۍ اجلاس ته وينا په مهال د ايران صدر مسعود پزشکيان هم د پاکستان او سعودي عرب ترمينځ دفاعي معاهدې هرکلې کړې وو او دا معاهده ئې د منطقې او مينځني ختيځ د سيکيورټۍ په حواله ډير مهم پرمختګ بللې وو ۔