جنوبي وزیرستان لویر: انګور اډه د دوه کلونو وروسته پرانیستل شوه، په ولس کې د خوښۍ څپه خپره شوې ده او ځایی اولس او مشرانو د دواړو حکومتونو څخه ځانګړې مننه کړې چې دوه کاله وروسته ی انګور اډه د کاروباري او عام تګ راتګ لباره خلاصه کړه.
د پاکستان او افغانستان ترمنځ د انګور اډه سرحدي دروازه چې دوه کاله تړلې وه، نن په رسمي ډول پرانیستل شوه. د دې ګام له امله ولس او تجارتي کړیو په دې پریکړه د خوښې څرګندونه کړې ده. ځکه دا دروازه پرانیستل د اقتصادي فعالیتونو د بیا راژوندي کېدو او د تجارتي اړیکو د پیاوړتیا لپاره یوه ستره لاسته راوړنه ګڼل کېږي.
د پرانیستلو په دستوره کې د قامي اسمبلۍ غړي زبیر وزیر او د خمرانګ بریګېډ مرستیال قوماندان ځانګړې ګډون وکړ. پر دې مهال قومي مشران، علما کرام، زده کوونکي او د سیمې ګڼ شمېر اوسېدونکي هم حاضر وو. د مراسمو فضا پرجوشه او تاریخي وبلل شوه.
ویناکوونکو مشرانو په خپلو ویناوو کې وویل چې د انګور اډه دروازې بیا پرانیستل به نه یوازې د پاکستان او افغانستان ترمنځ سوداګرۍ ته وده ورکړي، بلکې د سرحدي خلکو لپاره به د روزګار او اقتصادي پرمختګ نوې لارې هم پرانیزي.
ځايي اوسېدونکو رسنیو ته وویل چې د اړتیا وړ توکو لېږد رالېږد به اوس اسان شي او تجارتي فعالیتونو کې به ستر بدلون راشي. د هغوی په وینا، د دوو کلونو تړل کېدو پر مهال ولس له سختو ستونزو سره مخامخ شو، خو د دروازې په پرانیستو سره د ښه کېدو هیله پیدا شوې ده. یادونه باید وشي چې انګور اډه د دواړو هېوادونو ترمنځ د تجارتي مالونو د تګ راتګ مهم مرکز ګڼل کېږي. د شنونکو په باور، د دې دروازې پرانیستل به په سیمه کې د سولې، ثبات او ولسي سوکالۍ لپاره یو مثبت ګام ثابت شي.
نورخبرونه