لومړی وزیر محمد شهباز شریف د لوړپوړي پلاوي سره د سعودي عربستان، قطر او ترکیې څلور ورځني رسمي سفر ته روان شوی دی، چې د اپرېل له ۱۵مې تر ۱۸مې پورې به دوام ولري. د سفر موخه د دوه اړخیزې اقتصادي همکارۍ پیاوړتیا او د سیمهییزې سولې او امنیت په اړه له مهمو نړیوالو شریکانو سره مشورې کول دي
د بهرنیو چارو وزارت د معلوماتو له مخې، د لومړي وزیر سفر سعودي عربستان او قطر ته دوه اړخیزه بڼه لري، چې پکې به له دواړو وروڼو هېوادونو له لوړپوړو مشرانو سره لیدنې وشي. په دې لیدنو کې به د اقتصادي مشارکت، پانګونې او روانو ګډو پروژو په اړه خبرې وشي، او د سیمې پر وضعیت او نړیوالې سولې د ګډې ستراتیژۍ ارزونه هم وشي
په دوهم پړاو کې به لومړی وزیر ترکیې ته لاړ شي، چیرې چې هغه به د “پنځم انطالیه ډیپلوماسي فورم” کې ګډون وکړي او د مشرانو په غونډه کې به د پاکستان دریځ وړاندې کړي. د فورم په څنډه کې به د ترکیې له ولسمشر رجب طیب اردوغان او نورو نړیوالو مشرانو سره هم لیدنې وکړي
د سفارتي سرچینو په وینا، دا سفر په داسې وخت کې ترسره کېږي چې پاکستان د منځني ختیځ د سولې په هڅو کې د یو مهم منځګړي په توګه رول لوبوي، او په دې سفر کې به د امریکا او ایران د مذاکراتو او د هرمز تنګي وضعیت په اړه هم مهمې مشورې وشي. د پلاوي مشري د بهرنیو چارو وزیر اسحاق ډار، د اطلاعاتو وزیر عطاالله تارړ او نور لوړپوړي چارواکي هم کوي