په ملګرو ملتونو د امنیت شورا کې د ۲۰۱۵ د اټومي تړون له مخې پر ایران د بندیزونو د نرمښت مودې د غځولو لپاره وړاندې شوې پرېکړه لیک تصویب نه شو.
د ملګرو ملتونو امنیت شورا د چین او روس له خوا وړاندې شوې ګډه پرېکړه لیک رد کړو. د راپورونو له مخې، د پرېکړه لیک رد کېدل دا معنا لري چې د تړون له مخې له ایران څخه لیرې شوي بندیزونه به له نن ماښام څخه بېرته نافذ شي.
د ۱۵ کسیزې امنیت شورا له غړو څخه ۹ د پرېکړه لیک مخالفت وکړ، ۴ یې ملاتړ وکړ او ۲ حاضر نه وو.
د روسیې مرستیال دايمي استازي دیمتري پولیانسکي د غونډې پر مهال وویل چې هېواد یې پر ایران د بندیزونو بیا لګول په کلکه ردوي.
هغه د تهران پر ضد پرېکړه لیکونه ناقانونه او نه عملي کېدونکي وبلل او تور یې ولګاوه چې درې اروپايي هېوادونه غواړي اټومي تړون بشپړ له منځه یوسي. د ایران د بهرنیو چارو وزیر عباس عراقچي له ملګرو ملتونو غوښتنه وکړه چې دغه وضعیت غیرقانوني وبولي. هغه تور ولګاوه چې امریکا په ډیپلوماسۍ کې خیانت کړی او برتانیې، فرانس او جرمني دغه تړون خښ کړی
نورخبرونه
هند له مو د میۍ په جنګ کې ماتې ورکړې ده: وزیراعظم شهباز شریف