ترکيې د افغان طالبانو له حکومت سره د اړیکو په کچه د کمښت اقدام کړی او په کابل کې یې د خپلې استازولۍ درجه راټیټه کړې، چې د هیبت الله رژیم سره د پراخېدونکې ناخوښۍ نښه ګڼل کېږي. د کابل د سفارتي سرچینو په وینا، ترکيې په افغانستان کې د خپل پخواني سفیر د دورې د ختمېدو وروسته نوی سفیر نه دی ټاکلی، بلکې د سفارتي کچې د کمولو په ترڅ کې یې ناظم الامور ټاکلی دی.
سرچینې وایي چې د ترکيې پخواني سفیر چنک اونال دوره یې د دسمبر ۲۰۲۵ په میاشت کې پای ته رسېدلې وه، او د هغوی د وطن ستنېدو وروسته انقره کابل لپاره نوی سفیر نه دی ټاکلی. پر ځای یې د ترکيې لوړپوړي سفارتکار سادین آی یلدز کابل کې د ناظم الامور په توګه مقرر شوی، چې په سفارتي عرف کې د سفیر په پرتله د کمې درجې استازولۍ په توګه ګڼل کېږي.
د کابل څخه ترلاسه شوې معلوماتو په اساس، سادین آی یلدز یو ورځ مخکې د افغان طالبانو د بهرنیو چارو وزیر امیر خان متقي سره ولیدل، چې په دې لیدنه کې یې په رسمي توګه د ترکيې لخوا په کابل کې د سفارتي استازولۍ د درجې د راټیټولو پریکړې خبر ورکړ. دا لیدنه په داسې وخت کې وشوه چې د طالبانو حکومت د نړیوالې ټولنې له خوا د سفارتي یوازیتوب او فشار سره مخ دی.
سرچینې وایي چې د طالبانو د بیا واکمنۍ وروسته ترکيې لږ تر لږه دوه ځله خپل لوړپوړی سفارتکار په کابل کې بدل کړی دی، خو اوس د سفیر پر ځای د ناظم الامور ټاکنه د طالبانو ادارې سره د سفارتي اړیکو د ټیټې کچې څرګند نښه ګڼل کېږي.
د نړیوالو سفارتي حلقو په وینا، د کوم هېواد له خوا د سفیر پر ځای د ناظم الامور ټاکل دا څرګندوي چې یاد هېواد د کوربه حکومت سره بشپړ سفارتي اعتماد یا سیاسي همغږي نه لري، او دغه ګام اکثر د ناخوښۍ یا تحفظاتو د څرګندولو لپاره پورته کېږي.
سادین آی یلدز مخکې په قزاقستان، هالنډ او اوکراین کې د ترکيې د قونصلګر په توګه خدمتونه ترسره کړي او د یو تجربه کار سفارتکار په توګه ګڼل کېږي. خو په کابل کې د ناظم الامور په توګه د هغه ټاکنه د ترکيې او طالبانو د حکومت ترمنځ د اړیکو د یخوالي او محتاطانه سفارتي چلند ښکارندویي کوي.