د پيپلزپارټۍ چيئرمين بلاول بهټو زرداري په مشرۍ کښې د پاکستان پارليماني وفد واشنګټن کښې امهم ملاقاتونه کړيدي ۔ پاکستاني وفد کانګرس لپاره د خارجه امورو د کميټۍ د ممبرانو او نورو سنيټرانو سره ليده کاته کړيدي ، دې ملاقاتونو کښې د پاکستان او امريکې تعلقات،د سيمې صورتحال او په خصوصي توګه پاکستان هند تاؤ تريخوالي په معاملو خبرې شويدي ۔ بلاول بهټو زرداري د امريکې سنيټران د جنوبي ايشيا د صورتحال نه خبر کړيدي او د هندوستان او پاکستان ترمينځ جهګړه ختمولو کښې ئې د صدر ډونلډټرمپ،نائب صدر او خارجه وزير د کوششونو ستائينه کړيده ۔ ملاقاتونو په وخت پاکستاني وفد امريکني چارواکو د پاکستان خلاف د نريندر مودي رويې او د پهلګام پيښې نه پس پيدا شوي صورتحال باندې تفصيلي بريفنګ ورکړېدے ۔ وفد د جنګ بندۍ باوجود د هند د وزيرانو لخوا د پاکستان خلاف منفي پروپګنډا او د تاؤ تريخوالي سبب ګرځيدونکي بيانونو باندې د تشويش او افسوس اظهار کړېدے او وئيلي ئي دي چې د بهارتي حکومت پاليسي د منطقې امن خرابول دي ۔ بلاول بهټو زرداري د کانګرس ممبرانو نه مطالبه کړيده چې د هند لخوا په يک طرفه توګه سند طاس معاهده معطل کولو نوټس دې واخلي او د کشمير کشالې د پائيدار حل لپاره دې دا مسئله د متحده قامونو د قراردادونو مطابق حل کيدو لپاره په هند حکومت دباؤ واچوي ۔خارجه وزارت د هند جارحيت خلاف سفارتي مشن دوران د وزيراعظم شهباز شريف خصوصي معاون طارق فاطمي د روس د دورې او ملاقاتونو تفصيلات جاري کړيدي ۔ خارجه دفتر بيان ترمخه طارق فاطمي ماسکو کښې د روس خارجه وزير سرګې لاروف او د خارجه پاليسۍ لپاره د صدر مشير يوري اوشاکوف سره ملاقاتونه کړي وو۔ دې ملاقاتونو دوران هندوستاني جارحيت نه د روس حکومتي چارواکي خبر کړي شوي وو،د پاکستان او روس تعلقاتو پراختيا او توانائۍ شعبو کښې تعاون په معاملو هم دې ملاقاتونو دوران خبرې شوې وې ۔
