اسلام آباد: د راتلونکي مالي کال د بجټ د وروستي کولو لپاره د پاکستان او نړیوالې مالیې صندوق (آی ایم ایف) ترمنځ خبرې د پرېکړې پړاو ته داخلې شوې دي، چې له امله یې د آی ایم ایف د ماموریت د پاکستان سفر دوه ورځې نور هم وغځول شو
د سرکاري سرچینو له مخې، د دواړو لوریو ترمنځ پر ډېرو اقتصادي مسایلو هوکړه شوې، خو لا هم په ځینو مهمو شرطونو خبرې روانې دي
د معلوماتو له مخې، نړیوال مالي ادارې د پیټرولیم لیوي د هدف د ۱۸ سلنې زیاتوالي سخت سپارښتنه کړې، په داسې حال کې چې اوس پر هر لیټر پیټرول ۱۰۸ روپۍ ۱۷ پېسې لیوي لګېدلې ده
آی ایم ایف له صوبو هم غوښتنه کړې چې خپل مالي فشار زیات کړي او ۴۳۰ اربه روپۍ اضافي عاید راټول کړي
همدارنګه غوښتنه شوې چې صوبې وفاق ته نږدې ۲ ټریلیونه روپۍ سرپلس ورکړي
د فیډرل بورډ آف ریونیو لپاره د راتلونکي مالي کال د ټیکس مجموعي هدف ۱۵۲۶۴ اربه روپۍ ټاکل شوی، چې د ۲۰۲۶ د دسمبر تر نیمایي پورې یې هدف ۷۰۲۲ اربه روپۍ وړاندیز شوی دی
سرچینې وایي چې د راتلونکي مالي کال لپاره د پاکستان د بهرنیو مالي اړتیاوو اندازه ۲۱.۲ اربه ډالر اټکل شوې ده
په خبرو کې آی ایم ایف پاکستان ته د ۴۳۰ اربه روپیو نوو ټیکس اقداماتو سپارښتنه هم کړې ده
همدارنګه په کال کې دوه ځله د ګاز او برېښنا د نرخونو د زیاتولو شرط هم پر ځای ساتل شوی دی
د هېواد د اقتصادي وضعیت په اړه د راتلونکي مالي کال لپاره د ودې کچه ۳.۵ سلنه او اوسط انفلاسیون ۸.۴ سلنه اټکل شوی دی
په همدې سختو اقتصادي شرطونو کې د بې وزلو خلکو لپاره د بې نظیر انکم سپورټ پروګرام درې میاشتنۍ مرسته له ۱۴۵۰۰ روپیو څخه ۱۸ زرو روپیو ته د لوړولو موقتي هوکړه هم شوې ده
همدارنګه آی ایم ایف د ځانګړو اقتصادي زونونو لپاره د نوو ټیکس معافیتونو نه ورکولو او د ټېکنالوژۍ زونونو مراعاتو د ۲۰۳۵ پورې په پړاوونو کې ختمولو سپارښتنه هم کړې ده
نور ولولئ