د هند د لومړي وزیر نریندرا مودي د ناروې سفر پر مهال د مطبوعاتي ازادۍ په اړه د پوښتنې هڅه کوونکې مشهوره ناروېژۍ خبریاله هیلې لېنګ ادعا کړې چې د هغې د انسټاګرام حساب معطل شوی دی. هغې په «ایکس» کې د خپل حساب د بندېدو سکرینشاټ هم شریک کړی او ویلي یې دي چې د ورځې په اوږدو کې یې خپل حساب ته د ننوتلو ستونزې لرلې، تر دې چې بالاخره یې حساب بند شو
هیلې لېنګ ویلي چې دا د هغې د مسلکي ژوند له تر ټولو سختو تجربو څخه ده او دا یې د مطبوعاتي ازادۍ لپاره «کوچنی قیمت» بللی دی. د هغې په وینا، دا ډول اقدامات د حقیقت د بیانولو پر وړاندې یو ډول فشار او خنډ دی
دغه پېښه په نړیواله کچه د ډیجیټل حقونو فعالانو، خبریالانو او مبصرینو له سخت غبرګون سره مخ شوې ده. ځینې شنونکي ادعا کوي چې د لویو ټکنالوژۍ شرکتونو دننه سیاسي اغېزې او شبکې د داسې پرېکړو تر شا رول لري
مبصرین دا عمل د بیان ازادۍ او نړیوالې صحافت پر وړاندې جدي اندېښنه بولي او وایي چې دا ډول پېښې د دې پوښتنه راپورته کوي چې ایا په معاصرو ډیموکراسيو کې د رسنیو ازادي په بشپړ ډول تضمین شوې ده که نه