اسلام آباد کې ډسټرکټ اینډ سیشن کورټ د ټک ټاکر ثنا یوسف د لوړ پروفایل قتل کیس کې خپله خوندي شوې پرېکړه واوروله او د جرم ثابتېدو وروسته یې مرکزي ملزم عمر حیات ته د مرګ سزا واوروله او همدارنګه یې ورته مجموعي ۳۰ کاله بند او ۲۴ لکه روپۍ جرمانه هم ولګوله
د عدالت د فیصلې له مخې عمر حیات ته د قتل د مادې تر لاندې د مرګ سزا ورکړل شوه او په کیس کې د شامل نورو درېو مختلفو مادو تر لاندې ورته درې ځله لس، لس کاله بندي سزاوې هم واورول شوې چې پکې د ډکیتۍ او غیر قانوني ډول د کور دننه د داخلېدو دفعات شاملې وې
د مقدمې د اورېدنې پر مهال عدالت ته قوي شواهد وړاندې شول چې پکې د موبایل چیټونو ریکارډونه، د ټیلیفون کال ډیټا او مهم سکرین شاټونه شامل وو چې د ثبوت په توګه وړاندې شول
د فارنزک راپور له مخې دا هم ثابته شوه چې د ثنا یوسف په موبایل کې د کاکا په نوم محفوظ شوی نمبر په اصل کې د ملزم عمر حیات و چې دا د قضیې مهم ثبوت و
د سماعت پر مهال د ملزم وکیل دا دریځ خپل کړ چې د هغه مؤکل ته باید د آئین د آرټیکل 10A له مخې د منصفانه محاکمې بشپړ حق ورکړل شي او عدالت باید د کوم بهرني فشار یا ادارو تر اغېز لاندې پرېکړه ونه کړي
خو د وکیل د دې خبرو پر مهال قاضي افضل مجوکه سخت غبرګون وښود او وکیل ته یې سپارښتنه وکړه چې عدالت ګمراه نه کړي او د بې ځایه دلایلو څخه ډډه وکړي
بل لور ته ملزم په محکمه کې د جرم انکار وکړ او ویې ویل چې له ثنا یوسف سره هېڅ ډول اړیکه نه لري او نه یې د قتل اعتراف کړی، خو د فارنزک او ډیجیټل شواهدو له مخې د هغه دا دعوه رد شوه
یادونه دا ده چې ثنا یوسف د ۲ جون ۲۰۲۵ په اسلام آباد کې د خپل کور دننه په بربریت سره وژل شوې وه او د پېښې وروسته قانون نافذو ادارو سمدستي اقدام وکړ او عمر حیات یې د ۳ جون ۲۰۵۵ په ورځ له جړانواله څخه ونیوه او وروسته له اوږدې محاکمې عدالت خپل پرېکړه صادره کړه