د هند صدراعظم نریندر مودي وروستی اروپايي سفر د نوي ډیلي لپاره په یو سخت سفارتي کړکېچ بدل شوی دی، چې له امله یې د هند نړیواله څېره تر سختو نیوکو لاندې راغلې ده. مودي چې د اقتصادي اړیکو او سفارتي همکاریو د پراختیا په موخه اروپايي هېوادونو ته تللی و، هلته د بشري حقونو او د اقلیتونو د وضعیت په اړه له سختو پوښتنو او فشارونو سره مخ شو
له هالنډ څخه تر ناروې او سویډن پورې د سفر پر مهال د بشري حقونو فعالانو، رسنیو او ځینو سیاسي حلقو د هند د داخلي پالیسیو په ځانګړي ډول د مسلمانو او نورو اقلیتونو په وړاندې د چلند په اړه جدي اندېښنې څرګندې کړې. په عامه غونډو او رسنیزو بحثونو کې مودي له سختو پوښتنو سره مخ شو، چې له امله یې د هند سفارتي پلاوی په دفاعي حالت کې ولوېد
د نړیوالو راپورونو له مخې، د کشمیر وضعیت، په هند کې د مذهبي اقلیتونو پر ضد تشدد، او د سکه ټولنې په اړه راپورته شوي ادعاوې هغه موضوعات وو چې د سفر پر مهال یې پراخ انعکاس وموند. دا ټول مسایل د دې لامل شول چې د مودي د سفر اصلي موخه، یعنې د اقتصادي او سیاسي اړیکو پیاوړتیا، تر سیوري لاندې راشي
د بهرنیو چارو کارپوهان وايي چې دا سفر د هند لپاره د لاسته راوړنو پر ځای د سفارتي فشارونو او نړیوالو نیوکو سرچینه ګرځېدلې ده. د دوی په وینا، د اقلیتونو او بشري حقونو په اړه راپورته شوي پوښتنې اوس د هند د نړیوالو اړیکو یوه مهمه ننګونه ګرځېدلې ده، چې له پامه غورځول یې نور ممکن نه ښکاري