د افغانستان د ازادۍ جبهې د سیاسي کمېټې مشر، داوود ناجي، وایي چې په بدخشان کې د خلکو وروستي اعتراضونه د طالبانو د دوامدار ځپنې، سپکاوي او زورزیاتي پایله ده، نه یوازې د کوکنارو د کروندو د له منځه وړلو له امله.
ناجي له افغانستان انټرنېشنل ټلوېزیون سره په مرکه کې وویل، د بدخشان اوسنی پاڅون د افغانانو د ګډ درد او ګډ شعور څرګندونه ده. د هغه په وینا، افغانانو نږدې درې کاله داسې واکمني زغملې چې نه قانوني، نه دیني، نه عرفي او نه هم انساني مشروعیت لري، او یوازې د زور، زندان، شکنجې او وژنو له لارې هېواد اداره کوي.
هغه زیاته کړه چې بدخشان په تاریخي ډول د مقاومت او ازادۍ غوښتنې مرکز پاتې شوی، او په وروستیو ورځو کې د طالبانو چلند خلک دې ته اړ کړي چې نور چوپ پاتې نه شي. ناجي وویل، اصلي ستونزه یوازې د کوکنارو د کروندو ویجاړول نه دي، بلکې د طالبانو د غیرمحلي قومندانانو ناوړه چلند، د خلکو کورونو ته جبري ننوتل، سپکاوی او پرلهپسې توهینونه دي.
د ازادۍ جبهې د سیاسي کمېټې مشر همداراز وویل چې دغه جبهه منظم تشکیلات، ځواکونه او ستراتیژیک پلانونه لري، او د همدې پلان له مخې یې د پسرلنیو عملیاتو پیل اعلان کړی دی. د هغه په وینا، د بدخشان د خوستک درې سیمه ستراتیژیک اهمیت لري، او د جبهې ځواکونو په دې سیمه کې حضور موندلی دی.
دا څرګندونې داسې مهال کېږي چې په بدخشان کې په وروستیو ورځو کې ګڼ شمېر خلکو د طالبانو د کړنو پر ضد اعتراضونه کړي، او راپورونه د طالبانو او ځايي اوسېدونکو ترمنځ د تاوتریخوالي د زیاتېدو خبر ورکوي.