د مهاجرینو ستونزو ته د رسېدنې عالي کمېسیون دارالانشاء د جمعې ورځې مطابق کاري راپور خپور کړی، چې پکې له بېلابېلو فرضي کرښو او لارو څخه د راستنېدونکو افغان کډوالو د ثبت، انتقال او مرستو تفصیلي معلومات وړاندې شوي دي.
د راپور له مخې، یوازې په ننګرهار کې د تورخم له لارې ۸۹۶ کورنۍ (۴۸۴۵ تنه) هېواد ته راستنې شوې او ثبت شوې دي، چې له ډلې یې ۶۹۱ کورنۍ بېلابېلو ولایتونو ته لېږدول شوې دي. همدارنګه له یادو کورنیو سره نغدي مرستې او د ټرانسپورټ اسانتیاوې برابرې شوې دي، او ۸۹۶ سیمکارتونه هم ویشل شوي دي. په تورخم کې راستنېدونکو ته روغتیايي، معلوماتي او عامه پوهاوي خدمات هم وړاندې شوي دي.
په کندهار کې د سپین بولدک له لارې ۸۳ کورنۍ (۴۸۷ تنه) راستنې شوې او ثبت شوې دي، چې ۱۰۳ کورنۍ نورو ولایتونو ته لېږدول شوې دي. دلته هم د مالي مرستو ترڅنګ خوراکي توکي او ۷۶ سیمکارتونه ویشل شوي دي.
په نیمروز ولایت کې د ورېښمو لارې له لارې ۶۰ کورنۍ (۲۳۳ تنه) او ۱۳۸۵ مسافر هېواد ته راستانه شوي، چې له ډلې یې ۸۳۳ تنه درملنه شوي او ۷ سیمکارتونه ورکړل شوي دي. همدارنګه د عامه پوهاوي پروګرامونه هم ترسره شوي دي.
په هرات کې د اسلام کلا له لارې ۲۷ کورنۍ راستنې او ثبت شوې دي، چې له هغوی سره مالي مرستې او د انتقال اسانتیاوې برابرې شوې دي.
په کابل کې بیا ۲۳۷ کورنۍ (۱۲۷۵ تنه) بېلابېلو ولایتونو ته لېږدول شوې دي او ورته نغدي کرایه هم ورکړل شوې ده.
د راپور په ټولیزه توګه ویل شوي چې ۱۰۶۶ کورنۍ او ۵۶۵۶ افراد ثبت شوي، ۱۰۳۱ کورنۍ او ۵۴۲۹ افراد لېږدول شوي، ۸۹۰ کورنیو سره مرستې شوي او ۹۷۹ سیمکارتونه ویشل شوي دي.
د مهاجرینو ستونزو ته د رسېدنې عالي کمېسیون دارالانشاء ویلي چې د راستنېدونکو کډوالو لپاره د خدماتو بهیر به لا هم دوام ولري او د هغوی د اسانتیا لپاره به نورې لازمې تدابیر هم ونیول شي.