پېښور: پاکستاني چارواکو د هغه ادعاوو رد کړی چې ګواکې د بېاسنادو بهرنیو اتباعو، په ځانګړي ډول افغان کډوالو د راستنولو په بهیر کې ځنډونه قصدي دي. هغوی وایي چې د تورخم په پوله موجود وضعیت د قانوني پروسیجرونو او د افغان لوري د محدود اداري ظرفیت له امله رامنځته شوی دی
چارواکي وايي له تورخم څخه تر پېښوره د لاریو او کورنیو اوږده کتارونه د سختو اسنادو او بیومتریک تصدیقونو له امله جوړ شوي دي. د هغوی په وینا، هر هغه کس چې له پاکستانه وځي، په بشپړ ډول چک کېږي څو قانوني اطاعت یقیني شي او راتلونکي ستونزې رامنځته نه شي
هغوی ټینګار کوي چې د امنیتي پروتوکولونو نه رعایت کېدل ناشوني دي، ځکه دا د دواړو هېوادونو د اوږدمهاله امنیت لپاره مهم دي
بشري اندېښنې او د تورخم همغږۍ ستونزې
په ورته وخت کې، ځینې شنونکي د پاکستان پالیسي داسې تشریح کوي چې هېواد له څلورو لسیزو راهیسې میلیونونه افغان کډوال مېلمه کړي او اوس د تدریجي او منظم بېرته ستنېدو پروسه روانه ده
چارواکي همدارنګه وایي چې د پولې فشار د افغانستان د سرپرست حکومت له خوا د ورځني منلو د محدود ظرفیت سره تړاو لري، چې له امله یې د پاکستان په لوري د وسایطو کتارونه جوړ شوي دي
په همدې حال کې، د ضلعې ادارې د تورخم په پوله منتظرو کورنیو ته د اوبو، خوړو او طبي اسانتیاوو برابرولو خبر ورکوي. پاکستان له نړیوالې ټولنې او UNHCR څخه غوښتنه کړې چې یوازې د بیانونو پر ځای عملي مرسته وکړي
په پای کې حکومتي استازي وایي پاکستان له افغانستان سره د لا ښه همغږۍ غوښتونکی دی څو د پولې ستونزې کمې شي. هغوی ټینګار کوي چې هدف ستونزې جوړول نه، بلکې د منظم او قانوني سرحدي مدیریت عملي کول دي
افغانستان کې ژورنالېزم محاصره؛ د طلوع نیوز نیونه او معلوماتي تورتم