آزادئ صحافت او د ولسواکۍ بنسټ
دا ورځ موږ ته دا حقیقت راپه زړه کوي چې ازاده او مسؤله صحافت د هر قوي ولسواک نظام بنسټ دی. ازاد صحافت نه یوازې واکمنان د خلکو پر وړاندې ځواب ویونکي ګرځوي، بلکې د ولس د پوهاوي لوړولو، د حقیقت څرګندولو او د سمو معلوماتو د خپرولو په برخه کې مهم رول ادا کوي
قابل اعتماد معلوماتو ته لاسرسی، د فکري مکالمې وده او د ټولنیز یووالي رامنځته کول د رسنیو له مهمو مسؤلیتونو څخه دي. ازادې رسنۍ په ټولنه کې باور، زغم او فکري توازن رامنځته کوي. له همدې امله صحافت ته د “دولت څلورم ستن” ویل کېږي، ځکه چې دا هم د نظام څارنه کوي او هم د ولس او واکمنو ترمنځ د پُل رول ترسره کوي
ازادې رسنۍ د سولې، اقتصادي ثبات، دوامداره پرمختګ او د بشري حقونو د ساتنې لپاره اړینې دي. که صحافت ازاد نه وي، نو حقیقت پټ پاتې کېږي، عدالت کمزوری کېږي او ټولنه د ناپوهۍ تیارو ته لوېږي
د رسنیو د ټولنیز رول اهمیت
د پاکستان تاریخ د رسنیو د قربانیو څخه ډک دی. د اوسني اپوزیسیون مشر محمود خان اڅکزي پلار، خان عبدالصمد خان اڅکزی، د هغو مخکښو شخصیتونو څخه و چې د آزادۍ صحافت او ولسواکۍ لپاره یې اوږده مبارزه کړې ده. هغه کلونه کلونه زندانونه وزغمل او بالاخره د یو بمي برید په نتیجه کې شهید شو. د هغه ژوند د مبارزې، زغم او د حقیقت سره د وفادارۍ روښانه بېلګه ده
په اوسني وخت کې، چې معلومات په بېساري سرعت خپرېږي، د دروغو خبرونو، منفي پروپاګنډې او د مصنوعي ذهانت ناسم استعمال لویې ننګونې جوړې کړې دي. په داسې حال کې د خبریالانو مسؤلیت لا زیات شوی دی چې تحقیق، تصدیق او بېطرفي خپل اصل وګرځوي
آزادې رسنۍ او د پرمختګ اړتیا
دا یو سخت حقیقت دی چې په ټوله نړۍ کې ازادئ صحافت د بېلابېلو فشارونو او خطرونو سره مخ ده. په پاکستان کې په ځانګړي ډول په خیبر پښتونخوا او بلوچستان کې خبریالان په ډېر سختو شرایطو کې خپل کار ترسره کوي. د سولې او حقیقت لپاره ګڼ شمېر خبریالانو خپل ژوند له لاسه ورکړی دی، او د هغوی قربانۍ هېرول د ټولنیزې حافظې سره بېانصافي ده
د خبریالانو د امنیت نشتوالی او اقتصادي ستونزې عاجلې پاملرنې ته اړتیا لري. د حکومت مسؤلیت دی چې د ازادۍ صحافت ضمانت ورکړي، د خبریالانو د خوندیتوب لپاره عملي اقدامات وکړي او د هغوی مسلکي حقونه وساتي
هغه خبریالان چې د خپلې دندې پر مهال یې ژوند له لاسه ورکړی، هغوی ته باید درناوی وشي او د هغوی کورنیو ته باید د ملاتړ عملي نظام جوړ شي، لکه میاشتني وظیفې، د اوسېدو اسانتیاوې او د اولادونو لپاره تعلیمي بورسونه
د پاکستان د صحافت تاریخي قربانۍ
مسؤلانه صحافت د حقیقي آزادۍ صحافت بنسټ دی. که خبریالان صداقت، دیانت او مسلکي اصول خپل کړي، نو ټولنه به مثبت لوري ته پرمختګ وکړي
په بلوچستان او خیبر پښتونخوا کې خبریالان په ډېر سخت حالت کې کار کوي. په دې اړه د بلوچستان د وزیراعلیٰ میر سرفراز بګټي دا خبره مهمه ده چې د سوشل مېډیا د منفي پروپاګنډې د مخنیوي لپاره پالیسي جوړېږي، خو مثبت نقد د اصلاح وسیله ګڼل کېږي
قومي رسنیو ته پکار ده چې یوازې د جرمونو خبرونه نه، بلکې د ټولنیزو ستونزو، پرمختیایي فرصتونو او مثبتو اړخونو ته هم انعکاس ورکړي. همدارنګه د خبري ادارو له خوا د بیورو دفترونو تړل او د کارکوونکو لرې کول نه یوازې د مسلکي اصولو خلاف دي، بلکې د معلوماتو جریان هم محدودوي
په ډیجیټل عصر کې د خبرونو تصدیق د خبریال تر ټولو لوی اخلاقي مسؤلیت ګرځېدلی دی د حقیقت او دروغو ترمنځ توپیر ساتل د صحافت اصل روح دی
د ډیجیټل دور د خبرونو تصدیق
دا حقیقت هم روښانه دی چې ګڼ شمېر خبریالانو د خپل ملت او حقیقت لپاره خپل ژوند قرباني کړی، خو د هغوی کورنۍ لا هم له ستونزو سره مخ دي. نن اړتیا ده چې ریاست، رسنۍ او ټولنه په ګډه د خبریالانو قربانۍ ومني او د هغوی لپاره یو خوندي، باعزته او مستحکم چاپېریال برابر کړي
ازادئ صحافت یوازې یو شعار نه دی، بلکې یو مسؤلیت دی، او د حقیقت پر بنسټ راپور ورکول د پاکستان د روښانه او مستحکم راتلونکي ضمانت دی