په بدخشان ولایت کې د یاوان ولسوالۍ په مربوطاتو کې د طالبانو د دوو ډلو ترمنځ سخته وسله واله نښته رامنځته شوې ده. په دې نښته کې لږ تر لږه دوه طالبان وژل شوي او یو بل ټپي شوی دی.
د ځايي سرچینو په وینا، دغه نښته د رحمت الله امارتي او حاجي صفا پورې تړلو کسانو ترمنځ شوې ده. ویل کېږي چې د دواړو خواوو ترمنځ له اوږدې مودې راهیسې روان داخلي اختلافات د دې خونړۍ نښتې اصلي لامل ګرځېدلي دي. د وژل شویو کسانو پېژندنه د محمد سلیم او محمد عوض په نومونو شوې ده
طالبانو ادارې
تر اوسه د طالبانو ادارې د دې پېښې د لامل او جزییاتو په اړه کوم رسمي دریځ نه دی څرګند کړی، او نه هم دا پېښه په رسمي ډول تایید یا رد شوې ده. خو په سیمه کې د خلکو ترمنځ اندېښنه زیاته شوې او ویره شته چې دا داخلي اختلافات لا نور هم پراخ شي
دا لومړی ځل نه دی چې د طالبانو ترمنځ داسې نښتې کېږي، بلکې په تېرو څو میاشتو کې د افغانستان په بېلابېلو ولایتونو کې ورته پېښې راپور شوې دي. بدخشان چې پخوا هم د بېلابېلو وسله والو ډلو د فعالیتونو مرکز پاتې شوی، اوس د طالبانو د داخلي، قومي او سیمهییزو شخړو نوی مرکز ګرځېدلی دی
ځايي سرچینې وایي چې د دواړو ډلو ترمنځ نه یوازې د سرچینو پر وېش، بلکې د سیمهییزو اداري چوکیو د کنټرول او نفوذ پر سر هم اختلافات شته، چې کله ناکله په وسله والو نښتو بدلېږي
دې پېښې یو ځل بیا د بدخشان د امنیتي وضعیت په اړه پوښتنې راولاړې کړې دي. سیمهییز شنونکي په دې باور دي چې که د طالبانو مشرتابه ژر او مؤثر ګامونه پورته نه کړي، دا ډول نښتې به لا زیاتې شي او د ولایت ثبات ته به جدي زیان ورسوي
تر اوسه د طالبانو له لوري کوم رسمي غبرګون نه دی څرګند شوی، خو خلک د وېرې او اندېښنې په فضا کې ژوند کوي او د امنیت د ټینګښت لپاره د بېړنیو اقداماتو غوښتنه کوي