اسلامآباد: د پاکستان مرستیال لومړي وزیر او د بهرنیو چارو وزیر اسحاق ډار د ازبکستان له بهرنیو چارو وزیر بختیار سعیدوف سره ټیلیفوني اړیکه نیولې، چې پکې د منځني ختیځ وروستي وضعیت او پراخو سیمهییزو پرمختګونو په اړه تفصیلي خبرې شوې دي
د بهرنیو چارو وزارت ویاند په وینا، د دې مهمې خبرو پر مهال د ازبکستان بهرنیو چارو وزیر د سیمې د سولې او ثبات لپاره د پاکستان د مشرتابه فعال او مهم رول وستایه. هغه د تاشکند له لوري د پاکستان د هغو ټولو اقداماتو بشپړ ملاتړ څرګند کړ چې د سیمې دایمي سولې لپاره ترسره کېږي
ازبک وزیر په ځانګړي ډول د منځني ختیځ د لومړني دوو اونیو اوربند د یقیني کولو په برخه کې د پاکستان د بریالۍ ډیپلوماسۍ ستاینه وکړه او دا یې د سیمې لپاره یو مثبت پرمختګ وباله
پاکستان او منځنۍ اسیا
د خبرو پر مهال دواړو لورو د دې هوډ څرګند کړ چې د پاکستان او منځنۍ اسیا هېوادونو ترمنځ دوامداره مشورې او ډیپلوماټیک تماسونه به نه یوازې سیمه بلکې نړیواله سوله او امنیت هم پیاوړی کړي. دواړو بهرنیو چارو وزیرانو پر دې هم هوکړه وکړه چې په راتلونکي کې به دوه اړخیزه همکاري نوره هم پیاوړې کړي او پر مهمو سیمهییزو مسایلو به نږدې اړیکې وساتي
سیاسي شنونکي وايي، د منځنۍ اسیا مهم هېواد ازبکستان له لوري د پاکستان د سولې هڅو ملاتړ د دواړو هېوادونو ترمنځ د ستراتېژیک باور او ګډو سیمهییزو ګټو څرګندونه کوي