د امریکا او ایران ترمنځ د وروستیو کړکېچونو په کمېدو او د دوو اونیو مشروط اوربند وروسته، ډیپلوماټیک فعالیتونه چټک شوي دي. د ولسمشر ټرمپ په مشرۍ امریکايي ادارې ټینګار کړی چې ایران د فشار له امله شاتګ کړی، نه دا چې امریکا شاته شوې ده. د سپینې ماڼۍ په وینا، سره له دې چې اوربند شوی، لبنان د دې هوکړې برخه نه ده او ټول اړوند لوري پرې خبر کړل شوي دي
د سرچینو له مخې
د سرچینو له مخې، په همدې لړ کې امریکا اعلان کړی چې یو لوړپوړی مذاکراتي پلاوی پاکستان ته استوي، چې مشري به یې د امریکا مرستیال ولسمشر جې ډي وینس کوي، او ځانګړي استازي سټیو وټکوف او کشنر به هم پکې شامل وي. دا پلاوی به د شنبې په ورځ اسلامآباد ته ورسېږي، چیرته چې به د امریکا او ایران ترمنځ د خبرو لومړنی رسمي پړاو ترسره شي. دغه خبرې د سیمې د کړکېچ د کمولو او د اوږدمهاله سولې تړون پر لور مهم ګام بلل کېږي
بل لور ته، په دې جګړه کې د اسرائیل د رول په اړه هم پوښتنې راپورته شوې دي. د یوې پوښتنې په ځواب کې د سپینې ماڼۍ ویاند ویلي چې ولسمشر ټرمپ تېره شپه د اسرائیل له لومړي وزیر نتنیاهو سره خبرې کړې دي، چې پکې نوموړي د اوربند ملاتړ تکرار کړی او له امریکا سره یې د قوي مشارکت ژمنه کړې ده. امریکايي چارواکي وايي چې اسرائیل په وروستیو اونیو کې یو مهم متحد پاتې شوی، خو ځینې حقایق بیا برعکس انځور وړاندې کوي
اسرائیل په لبنان د بریدونو له لارې د اوربند د ناکامولو هڅه کړې، خو بریالی شوی نه دی، او داسې ښکاري چې د جګړې پای ته رسولو ته چندان چمتو نه دی
ډیپلوماټیکو هڅو
دا پرمختګونه په داسې وخت کې رامنځته کېږي چې د پاکستان د مشرتابه د ډیپلوماټیکو هڅو په پایله کې امریکا او ایران د خبرو مېز ته راوستل شوي دي. پاکستان نه یوازې د اوربند په رامنځته کولو کې رول لوبولی، بلکې دواړه هېوادونه یې اسلامآباد ته د مخامخ خبرو لپاره هم بللي، چې دا کار په نړیواله کچه مثبت ګام بلل کېږي
کارپوهان وايي، که دا خبرې بریالۍ شي، نو نه یوازې به د ایران او امریکا ترمنځ کړکېچ کم کړي، بلکې په منځني ختیځ کې به د پراخ ثبات لپاره هم لاره هواره کړي. خو په لبنان کې روان حساس وضعیت لا هم نامعلوم دی، چې دا بهیر لا پېچلی کولی شي