یوې نوې څېړنې د افغانستان اوسنی حکومتي نظام تر پوښتنې لاندې راوستی او دا بحث یې راپورته کړی چې ایا دا نظام رښتیا هم د اسلامي شریعت پر اصولو ولاړ دی، که د مذهب تر نامه لاندې یو مطلقه واکمني ده
موازي حکومتي جوړښت
د راپور له مخې، په هېواد کې یو منظم او واحد حکومت نشته، بلکې یو موازي نظام روان دی؛ کابل یوازې اداري بڼه لري، خو اصلي واک په کندهار کې د هبت الله اخوندزاده په لاس کې دی. ټول مهم تصمیمونه د هغه او محدودې ډلې له خوا نیول کېږي، او د کابل چارواکي یوازې ورځني چارې پر مخ وړي.
څېړنه ښيي چې دا نظام د “شورا” پر ځای د فردي فرمانونو پر بنسټ ولاړ دی، او بیعت هم خپل اصلي دیني مفهوم له لاسه ورکړی. دا حالت د “مذهبي استبداد” بڼه لري، چې پکې واکمن هېچا ته ځواب ویونکی نه دی
قومي نابرابري او استازیتو
همدارنګه، دا نظام د افغانستان څو قومي جوړښت نه منعکس کوي، او ډېر غیر پښتانه له واکه لېرې ساتل شوي، چې دا د قومي نابرابرۍ او وېش سبب شوی.
په پایله کې، راپور وايي چې دا سیستم د عدالت، برابري او مشورې له اصلي اسلامي ارزښتونو لرې شوی او پر وېرې، زور او فردي واک ولاړ دی، چې هېواد اقتصادي ستونزو، ټولنیز شاتګ او نړیوال انزوا ته بیایي