د فلسطین مقاومتي تنظیم حماس سیاسي مشر او ویاند ډاکټر خالد قدومی د فلسطین د مسئلې په اړه د پاکستان د سفارتي رول او اصولي دریځ څخه بشپړ اطمینان څرګند کړی او ویلي یې دي چې د پاکستان د حکومت او ولس اقدامات د فلسطیني سیاسي کړیو له خوا په درنه سترګه کتل کېږي. هغه دا خبرې د جمعې په ورځ د کراچی پریس کلب د لیدنې پر مهال له رسنیو سره په خبرو کې وکړې.
ډاکټر خالد قدومي وویل چې په غزہ کې روانه د نسل وژنې کمپاین د بندولو لپاره اوربند د نړیوال مسؤلیت غوښتنه ده، خو اسرائیل په پرلهپسې ډول د تړونونو سرغړونه کوي او د سولې هیلې له منځه وړي. هغه د «غزه پیس بورډ» په چوکاټ کې شامل اسلامي هېوادونو وغوښتل چې د دغو جدي سرغړونو جاج واخلي او د صهیوني بریدونو د درولو لپاره خپل اغېز وکاروي.
د حماس مشر د اقوامِ متحدہ وروستي راپور ته په اشارې سره وویل چې په غزه کې داسې امریکايي بمونه کارول شوي چې د هغوی د تودوخې له امله د انسانانو جسدونه په فضا کې تجزیه شوي، او د شهیدانو اصلي شمېر ښايي تر دوو لکو پورې ورسېږي.
شنونکي باور لري چې د ډاکټر خالد قدومي دا څرګندونې په نړیواله کچه د اسلاماباد اعتبار او د فلسطیني سیاسي مشرتابه ترمنځ د پاکستان د سفارتي منلو ښکاره ثبوت دی. پاکستان پر خپل دریځ ټینګار کوي چې په سیمه کې د تلپاتې سولې لپاره د اسرائیلي پوځي عملیاتو سمدستي بندېدل او د ملکي وګړو ساتنه اړینه ده. پاکستان د سولې بورډ کې د ګډون له لارې یو ځل بیا دا ژمنه تازه کړې چې د ۱۹۶۷م کال څخه مخکې پولو پر بنسټ د یوې خپلواکې او خپلمختارې فلسطیني دولت ملاتړ ته دوام ورکړي، چې پلازمېنه یې «القدس الشریف» وي.