د قزاقستان د ولسمشر قاسم جومارت توکایووف د پاکستان د سفر په ترڅ کې د دواړو هېوادونو ترمنځ د لوړې کچې خبرو اترو وروسته یو ګډ اعلامیه خپره شوه. په اعلامیه کې په افغانستان کې د دوامدارې سولې او ثبات، د سیمهییز اقتصادي همکارۍ او د نښلونکو اړیکو د پروژو د ودې پر اهمیت ټینګار وشو.
صدراعظم شهباز شریف او ولسمشر قاسم جومارت توکایووف د بېلابېلو نړیوالو لارو د فعالولو ژمنه څرګنده کړه، چې پکې د «قزاقستان–ترکمنستان–افغانستان–پاکستان او چین» لارې شاملې دي. صدراعظم شهباز شریف د قزاق ولسمشر هغه وړاندیز وستایه چې له مخې یې د ټرانس–افغان رېل پټلۍ له لارې منځنۍ او جنوبي اسیا سره ونښلول شي، او اړوندو چارواکو ته یې لارښوونه وکړه چې د رېل پټلۍ د احتمالي پرمختیايي پروژې ژر تر ژره ارزونه وکړي.
په اعلامیه کې پر دې مهم ټکي هم موافقه وشوه چې د افغانستان خاوره باید د داسې هېڅ ډول فعالیت لپاره ونه کارول شي چې د سیمې یا د نورو هېوادونو امنیت ته ګواښ جوړ کړي. دواړو مشرانو ټینګار وکړ چې د افغانستان ګډون په سیمهییزو اقتصادي همکارۍ او نښلونکو پروژو کې نه یوازې د افغان ولس، بلکې د ټولې سیمې د سوکالۍ لپاره اړین دی.