پېښور /خیبر: د ترهګرۍ پر ضد څانګې (سي ټي ډي) د ریښتوني استخباراتي معلوماتو پر بنسټ په پېښور او د خېبر ضلع کې دوه سترې او بریالۍ عملیات ترسره کړي، چې په ترڅ کې یې ټولټال شپږ خطرناک ترهګر ووژل شول.
د سي ټي ډي د وینا له مخې، دغه عملیات په هدفي او کمیني بڼه ترسره شول، چې موخه یې د ترهګرو فعالې شبکې له منځه وړل وو. په دواړو عملیاتو کې د ترهګرو له ولکې دروند وسلوال تجهیزات هم ترلاسه شوي دي.
چارواکي وایي چې وژل شوي ترهګر پر امنیتي ځواکونو د بریدونو، باج اخیستنې (بھتہ خوري) او نورو جدي جرمي پېښو کې ککړ وو. د عملیاتو پر مهال د ترهګرو یو شمېر ملګري له سیمې تښتېدلي، چې د هغوی د نیولو لپاره د لټون او ضربتي عملیات لا هم روان دي.
سي ټي ډي ټینګار کړی چې د صوبې په کچه به د ترهګرۍ پر ضد بېدرېغه او هدفمند اقدامات دوام ولري، څو د ولس امنیت باوري شي او د ترهګرو شبکو ته بشپړه ماتې ورکړل شي.
د ضلع خیبر ډي پي او دریځ
د ضلع خیبر د ډسټرکټ پولیس افسر وقاص احمد په وینا، لومړۍ کارروایي د شاکس بای پاس سړک په سیمه کې هغه مهال ترسره شوه، کله چې د ترهګرۍ ضد څانګې ته پټ استخباراتي اطلاع ترلاسه شوه چې ترهګر په سیمه کې موجود دي او د یوې لویې حملې پلان جوړوي
د ترلاسه شوې اطلاع پر بنسټ، د سي ټي ډي اهلکارو سمدستي عملیات ترسره کړل او د ترهګرو پټنځای یې کلابند کړ
د ډزو د تبادلې پر مهال درې ترهګر ووژل شول، خو د هغوی دوه ملګري د تیارې نه په ګټې اخیستنې سره وتښتېدل
ډي پي او وویل چې د وژل شوو ترهګرو له قبضې درې کلاشنکوفونه، مرمۍ او نور مهمات ترلاسه شوي دي۔ د پولیسو چارواکو په وینا، همدغې سیمې کې دوه ورځې وړاندې ترهګرو د سپېشل برانچ یو اهلکار په ډزو شهید کړی و
دوهمه کارروایي د ضلع خیبر د ملک دین خېل په سیمه کې ترسره شوه، چرته چې امنیتي ځواکونو د ترهګرو د موجودګۍ په اطلاع د لټون او هدفي عملیات ترسره کړل
د عملیاتو پر مهال د ډزو په تبادله کې دوه ترهګر ووژل شول۔ د کارروایۍ وروسته له ځایه یو مشین ګن او په زیاته اندازه مرمۍ ترلاسه شوې
د امنیتي سرچینو په وینا، وژل شوي ترهګر په بېلابېلو ترهګریزو فعالیتونو کې ښکېل وو او په سیمه کې یې د امن او امان د خرابولو هڅې کولې