اسلاماباد : د پاکستان مرستیال وزیراعظم او د بهرنیو چارو وزیر اسحاق ډار خبرداری ورکړی چې که د پاکستان د اوبو قانوني برخه ودرول شي، واړول شي او یا پرې کموالی راوستل شي، نو دا به د جګړې اقدام وبلل شي.
نوموړي وویل چې پاکستان د خپلې اوبو د امنیت په اړه هېڅ ډول جوړجاړي ته تیار نه دی
اسحاق ډار د بهرنیو چارو وزارت کې د یو بریفنګ پر مهال له نړیوالې ټولنې وغوښتل چې د اندس د اوبو تړون بشپړه بحالي، ساتنه او عملي کېدل یقیني کړي
دا تړون چې په ۱۹۶۰ کال کې د پاکستان او هند ترمنځ لاسلیک شوی، د دواړو هېوادونو ترمنځ د سیندونو د اوبو د وېش بنیادی چوکاټ ټاکي
نوموړي وویل چې پاکستان په پرلهپسې ډول د هند له لوري د اوبو د مدیریت او د هغو سیندونو پر سر د زیربنايي پروژو په اړه خپلې اندېښنې نړیوالو فورمونو ته رسولې دي، کوم سیندونه چې د تړون له مخې پاکستان ته ځانګړي شوي دي
هغه زیاته کړه چې د ملګرو ملتونو ځانګړي میکانیزمونو هم د هند د اوبو اړوندو اقداماتو په اړه اندېښنه څرګنده کړې ده
اسحاق ډار خبرداری ورکړ چې د هند له لوري د بندونو او برېښنايي پروژو جوړول د اوبو د زېرمه کولو وړتیا زیاتوي، چې له امله یې د اوبو د ناقانونه یا سیاسي استعمال خطرونه ډېر شوي دي.
د هغه په وینا، دا ډول اقدامات نه یوازې د اندس د اوبو تړون سره په ټکر دی بلکې د سیمې ثبات هم له جدي ګواښ سره مخ کوي
نوموړي وویل چې اوبه د پاکستان د اقتصاد،ذراعت او ولس لپاره د ژوند حیثیت لري. که څوک زموږ قانوني د اوبو حقونه تر پښو لاندې کړي، نو پایلې به یې ډېرې جدي وي
هغه ټینګار وکړ چې پاکستان د نړیوال قانون او د شته میکانیزمونو له لارې د ستونزو د حل ملاتړ کوي، خو پر خپلو ملي حقونو به هېڅ ډول معامله ونه کړي
اسحاق ډار وویل چې پاکستان د خبرو اترو او د تړون پر بنسټ د حل لارې غواړي، خو له نړیوالو شریکانو او د تړون تضمین کوونکو یې وغوښتل چې خپل مسؤلیت ادا کړي او د اندس د اوبو تړون عملي کېدل یقیني کړي. هغه خبرداری ورکړ چې یو اړخیز اقدامات کولای شي په سیمه کې شته ترینګلتیا لا پسې زیاته کړي
پاکستان بیا ټینګار کړی چې په جنوبي اسیا کې تلپاتې سوله د نړیوالو تړونونو درناوي او د ګډو طبیعي سرچینو د مسؤلانه مدیریت پرته ممکنه نه ده