په هند پټنه کې د یوې رسمي غونډې پر مهال د یوې مسلمانی ښځینه ډاکټری حجاب د زور له لارې لرې کولو له پېښې وروسته مقدمه درج شوې ده.
د هندي رسنیو د راپورونو له مخې، د سماجوادي ګوند مشره سمیه رانا د بهار د وزیراعلا نتیش کمار پر ضد په لکنهو کې قانوني دعوه ثبت کړې ده
د بشري حقونو نړیوال سازمان ایمنسټي انټرنېشنل انډیا د دې پېښې په کلکه غندنه کړې او ویلي یې دي چې د هر دولتي یا عامه چارواکي لهخوا د یوې ښځې حجاب یا نقاب په زور لرې کول د هغې د عزت، هویت او شخصي ازادۍ پر وړاندې جدي برید دی. د سازمان په وینا، دا ډول کړنې نه یوازې د ښځو له بنسټیزو حقونو سرغړونه ده، بلکې په ټولنه کې د وېرې او بېامنۍ فضا هم پیاوړې کوي
یادونه کېږي چې دا پېښه دوه ورځې وړاندې رامنځته شوې وه او ګڼو هندي سیاسي مشرانو، خبریالانو او د بشري حقونو سازمانونو دا عمل شرموونکی بللی دی.
د بشري حقونو فعاله ډېپيکا اپېشکا نات دا پېښه د جنسي ځورونې یوه جدي قضیه بللې، په داسې حال کې چې د مقبوضه کشمیر پخوانۍ وزیراعلی محبوبه مفتي هم د دې عمل په کلکه غندنه کړې او دا یې د ښځو سپکاوی بللی دی
له دې پېښې وروسته په عامه کچه د مسؤلو کسانو پر ضد د قانوني اقدام او د ښځو د خوندیتوب لپاره د اغېزمنو ګامونو د اخیستو غوښتنې زیاتې شوې دي