ډېره اسماعيل خان کې د پوليسو پر موبایل د ترهګرو د بريد له امله درې پولیس اهلکار شهید شوي دي، د پولیسو د معلوماتو له مخې، په پنیاله سیمه کې د ډګري کالج ترڅنګ ترهګرو د سړک په غاړه بم ښخ کړې وواو کله چې د پولیسو موټر سیمې ته ورسېد، نو ماین چاودنه وشوه
د پولیس ویاند وايي چې له چاودنې وروسته ترهګرو پر پولیس اهلکارو ډزې هم و کړې، چې په برید کې د ای ایس آی په ګډون درې اهلکار شهیدان شول
پولیس اړخ زیاتوي چې ترهګر له پېښې وروسته تښتیدلي دي، سیمه کلابنده شوې او د لټون عملیات پیل شوي دي. د شهید شوو اهلکارو جسدونه ډي ایچ کیو روغتون ته ورسول شول
د ترهګري له منځه وړلو پورې به مبارزه دوام وکړي : وزيراعظم
وزیراعظم شهباز شریف د ډېره اسماعيل خان پر پولیس موبایل د ترهګرو برید غندلی او د پولیس اهلکارو د شهادت په مناسبت ی د ژور غم او خواشینۍ څرګندونه کړې ده. هغه د شهیدانو د درجاتو د لوړېدو دعا هم کړې ده.
وزیراعظم د زخمي پولیس اهلکار لپاره د غوره طبي سهولتونو د برابرولو امر کړی او ویلي یې دي چې له دې هېواد څخه د ترهګرۍ د بشپړ ختمېدو تر وخته پورې جګړه روانه ساتو. هغه زیاته کړې چې د پېښې مجرمین به وپېژندل شي او ورته به سزا ورکړل شي
د خیبر پښتونخوا د پولیسو قربانۍ د قدر وړ دي: د کورنیو چارو وزير
د کورنیو چارو وفاقي وزیر، محسن نقوي، د ډېره اسماعيل خان په پېښه کې د پولیس پر موټر د فتنۀ الخوارج برید غندلی او شهید ای ایس آی ګل عالم، کانسٹیبل رفیق او سخي جان ته یې د عقیدت پېرزوینه وړاندې کړې دي
محسن نقوي د شهیدانو له کورنیو سره د غم شریکې او همدردۍ څرګندونه کړې او ویلي یې دي چې د خیبر پښتونخوا د پولیسو د زړورو سرتېرو قربانۍ به هېڅکله ضایع نه شي. هغه وویل چې د خیبر پښتونخوا پولیس د قربانیو ته د قدر او ویاړ په نظر ګوري
د خیبر پښتونخوا پولیس په زړه ورتیا د ترهګرو مقابله کوي: وزیراعلی سهیل افریدي
وزیراعلیٰ خیبرپښتونخوا سهیل آفریدی د پولیس فورس او سول افسرانو ګډ دربار ته په وینا کې ویلي چې اوسني حالات غیرمعمولي دي، او خیبرپښتونخوا له څلورو لسیزو راهیسې د ترهګرۍ تر ګوزار لاندې ده
هغه زیاته کړه چې پولیسو د لږو امکاناتو باوجود ۲۱ کاله د ترهګرۍ پر ضد په ډیره میړانه مبارزه کړې ده، او د دوی پر قربانیو ټول ملت فخر کوي
وزیراعلی آفریدی وویل چې پولیس کومه زړورتیا او عزم د ترهګرو پر ضد ښيي، هغه د ستایلو وړ دی.هغه وویل: چې که موږد الله تعالی د رضا او د ولس د ګټې لپاره وجنګېږو، نو بریا به زموږ وي.